Беларусь: духоўная літаратура запатрабавана ў сучаснага чытача
21-ы раз сталіца Беларусі
стала і літаратурнай сталіцай Еўропы. У Мінску працягвае сваю працу Міжнародная кніжная
выстава-кірмаш. І ўжо роўна 10 гадоў сярод нязменных удзельнікаў – каталіцкае выдавецтва
“Pro Christo”. Каля гэтага стэнду – заўсёды шмат наведвальнікаў. Не выпадкова: у
экспазіцыі, як кажуць, літаратурныя навінкі – кнігі, якія выйшлі ў свет у 2013 г.
А гэта ні многа, ні мала – 25 новых выданняў.
Адно з тых, што выклікала найбольшую
зацікаўленасць (і гэта было прадказальна) – Энцыкліка Святога Айца Францішка “Святло
веры” – пасланне Пантыфіка духавенству і ўсім вернікам у свеце, якое ў Год веры павінна
было ўмацаваць у веры сваіх адрасатаў, шмат якіх знайшлося і ў Беларусі, паведаміла
Аліна Новікава, дырэктар выдавецтва “Pro Christo”. “Гэта першая энцыкліка папы Францішка,
і выйшла яна на беларускай мове. Дакумент адлюстроўвае менавіта праблемы веры сучаснага
чалавека. І таму вялікая зацікаўленасць ёсць сярод навучэнцаў катэхетычнага каледжу,
іншых студэнтаў. І сапраўды, сама асоба Святога Айца Францішка да гэтага пабуджае”,
- сказала яна.
Увогуле, 2013 год для Каталіцкага Касцёла быў багатым на значныя
падзеі і гістарычныя даты, якія не маглі не знайсці адлюстраванне і на старонках духоўнай
літаратуры. “Аддаць жыццё сваё за братоў” – брашура, выдадзеная з нагоды 70-й гадавіны
мучаніцкай смерці кс. Вітальда Івіцкага. Ці, напрыклад, нарыс Язэпа Янушкевіча да
75-й гадавіны кананізацыі св. Андрэя Баболі – святара, які ў XVII ст. прыняў мучаніцкую
смерць. Кніга блізкая да сенсацыі. У ёй змешчаны дзве арыгінальныя паэмы пра святога,
а шматгадовая праца даследчыка дазволіла зрабіць выснову, што іх найбольш верагодным
аўтарам з’яўляецца Янка Купала.
Вось на паліцы і твор зусім іншага роду –
“Будслаў – прызнанне ў любові”. У час падрыхтоўкі да святкавання ўрачыстасці 400-годдзя
прыбыцця Будслаўскай іконы вернікі Беларусі дасылалі свае ўласныя творы, прысвечаныя
Маці Божай, святому месцу і цудадзейнаму абразу. Народная творчасць вылілася ў цэлую
кнігу, годную міжнароднай выставы, адзначыла Крыстына Лялько, галоўны рэдактар часопіса
“Ave Maria”. “Для людзей гэта вельмі важна, бо яны маліліся сваімі вершамі і творамі.
Мы думалі, што будзем друкаваць толькі ў часопісе, але творы выйшлі за рамкі часопіса,
і мы надрукавалі кнігу. А на ўрачыстасцях у Будславе прайшоў конкурс, і мы як узнагароду
ўручалі гэту кнігу. Мы рады, што цяпер можам прадставіць яе на міжнароднай выставе
і прапанаваць нашым чытачам”, - сказала пісьменніца.
А прапанаваць ёсць яшчэ
шмат чаго – на любы густ і ўзрост: для дзяцей –кніга ксяндза Яна Твардоўскага “Першая
Камунія з белым бантам” у перакладзе з польскай мовы Ірыны Жарнасек, кніга Ленэ Майер
Скуманц “І няхай сабе вераб’і чырыкаюць” пра святога Яна Боско, для дарослых – малітвы
падчас розных жыццёвых цяжкасцяў, кніга езуіцкага святара філосафа Юзафа Аўгустына
“Чвэрць гадзіны шчырасці”, для зацікаўленых маральнай тэалогіяй – кніга дамініканіна
Сэрве-Тэадора Пінкерса “Католическое нравоучение”. Запатрабаванасць у духоўнай літаратуры
не сціхае, а наадварот, год ад года толькі расце, падкрэсліла Аліна Новікава. “Цікавасць
не знікае, яна наадварот прымушае нас шукаць новыя тэмы і новыя выданні. Вельмі шмат
патрабаванняў. Цікавіць гісторыя рэлігіі, маральныя пытанні, шмат людзей просіць літаратуру,
якая б была прысвечана розным праблемам сям’і. Шмат пытанняў, якія існуюць у сучасным
свеце і якія чалавек жадае вырашыць часта без Бога, але без Бога гэтыя пытанні не
вырашыць”, - падкрэсліла дырэктар выдавецтва “Pro Christo”.
Зрабіўшы справаздачу
за мінулы год (экспазіцыю на выставе можна і так назваць), выдавецтва ўжо загружана
працай на гэты. Першымі кнігамі, якія з’явяцца ў новым годзе, будуць “Дзённік” святой
Фаўстыны Кавальскай ў перакладзе на беларускую мову пісьменніцы і перакладчыцы Крыстыны
Лялько, і кніга святога Хосэмарыі Эскрывы на беларускай мове “Гэта Хрыстус праходзіць”.
Да 100-годдзя з дня нараджэння першага кардынала Беларусі Казіміра Свёнтка, якое сёлета
адзначаецца, рыхтуецца кніга ўспамінаў пра знакамітага Сведку веры, а таксама выданне
ўнікальнага альбому фотаздымкаў прыроды Палесся, якія зрабіў некалі ён сам. Да 25-годдзя
біскупскага служэння мітрапаліта Мінска-Магілёўскага арцыбіскупа Тадэвуша Кандрусевіча
– зборнік яго дакладаў, гамілій, прамоваў за апошнія гады служэння. Плануецца выхад
серыі кніг а. Юзафа Аўгустына, кнігі ў дапамогу сям’і. Зноў жа, значныя падзеі і даты,
але таксама і штодзённая размова – важная і глыбокая – з чытачом з дапамогай кнігі.
Цікавай, карыснай і галоўнае – той, якая змяняе і навяртае.