Пантыфік да аўстрыйскіх біскупаў: апрацоўваць "поле Пана", каб прыносіла плады ў будучыні
Быць Касцёлам азначае
выходзіць, каб несці людзям радасць Евангелля, сцвердзіў папа Францішак ў пасланні
да аўстрыйскіх біскупаў, якіх 30 студзеня 2014 г. прыняў на аўдыенцыі ў рамках візіту
“ad limina Apostolorum”. Святы Айцец паразмаўляў з іерархамі ў сяброўскай атмасферы
і без афіцыйнай прамовы, тэкст якой яны атрымалі ў друкаванай форме. У гэтым дакуменце
Францішак адзначыў, што Касцёл ў Аўстрыі перажывае нялёгкія часы, адным з сімптомам
якіх з’яўляецца памяншэнне колькасць католікаў адносна агульнага насельніцтва краіны.
“Гэта эвалюцыя не павінна пакінуць энертнымі, а наадварот – стымуляваць нашы намаганні
ў сферы новай евангелізацыі, якая заўсёды неабходна”, - напісаў Святы Айцец.
З
іншага боку Пантыфік заўважыў, што павялічваецца “адкрытасць на салідарнасць” сярод
аўстрыйскіх вернікаў. Яна праяўляецца ў павелічэнні ахвяраванняў на карысць дабрачыннай
арганізацыі “Caritas” і іншых ініцыятываў.
Папа адзначыў, што быць Касцёлам
азначае не проста кіраваць тым, што было атрымана і ёсць у распараджэнні, але апрацоўваць
“поле Пана”, каб прыносіла плёны таксама і ў будучыні. Францішак заклікаў быць місійным
Касцёлам – несці людзям святло і радасць Евангелля. “Дзеці Божыя не хаваюцца, але
нясуць у свет радасць свайго боскага сыноўства”, - сказаў ён.
Гэта ставіць
перад вернікамі шэраг патрабаванняў – у першую чаргу весці святое жыццё, лічыць Пантыфік.
У дадзеным кантэксце ён нагадаў, што Касцёл заўсёды патрабуе ачышчэння, і таму заклікаў
адкрыць нанова “цудоўны сакрамэнт” споведзі – месца ў якім сустракаемся з міласэрнай
любоўю Божай і Хрыстом, які дае сілы для навяртання і новага жыцця”.