Papa: doktrina e Kishës të mos shndërrohet në ideologji, por t’i shërbejë Popullit
të Zotit
Të mos e shndërrojmë doktrinën e Kishës në ideologji, ose në teori abstrakte, por
ta përdorim gjithnjë në shërbim të besimtarëve. Në audiencën me pjesëmarrësit në asamblenë
e përgjithshme të Kongregatës për Doktrinën e Fesë, Papa Françesku kërkoi që kriteret
e fesë të udhëheqin gjithnjë fjalët e praktikën e Kishës. Kur feja shkëlqen për thjeshtësinë
e saj, tha Ati i Shenjtë, edhe në shoqëri, Zoti është i pranishëm me gjithë forcën
e Tij tërheqëse. Që kjo të ndodhë, vijoi Papa, nuk duhet ta kuptojmë doktrinën e krishterë
si ideologji, ose ta reduktojmë në një sërë teorish abstrakte: “Në të vërtetë,
doktrina ka si qëllim të vetëm t’i shërbejë jetës së Popullit të Zotit, duke i siguruar
fesë baza të shëndosha. Vërtet, është i madh tundimi për t’i paraqitur si tonat dhuratat
e shëlbimit, që vijnë prej Zotit, për t’ua nënshtruar – ndoshta, edhe me qëllim të
mirë - këndvështrimeve e shpirtit të kësaj bote. E ky është sigurisht, një tundim
që përsëritet vazhdimisht”. Më pas, Papa Françesku e falenderoi Kongregatën
për Doktrinën e Fesë për trajtimin e disa çështjeve të rënda, siç është ajo e shpërdorimit
seksual të të miturve. Në këtë fushë, lajmëroi risi: “Mendoni për të mirën e
fëmijve e të rinjve, që në bashkësinë e krishterë duhet të mbrohen e të përkrahen
në rritjen e tyre njerëzore e shpirtërore. Po studiohet mundësia e lidhjes së Dikasterit
tuaj me Komisionin e veçantë për Mbrojtjen e Fëmijëve, themeluar tashmë, që do të
doja të ishte shembull për të gjithë ata, të cilët duan të punojnë për të mirën e
fëmijëve”. Ati i Shenjtë nuk mungoi të fliste për temën e Asamblesë, përqendruar
në marrëdhëniet ndërmjet fesë dhe Sakramentit të martesës: “Kemi të bëjmë me
një reflektim me rëndësi të madhe. Ai është në vazhdën e ftesës, që e pati formuluar
qysh Benedikti XVI, rreth nevojës për t’i shqyrtuar deri në fund marrëdhëniet ndërmjet
fesë personale dhe kremtimit të Sakramentit të martesës, sidomos në kuadrin e ndryshuar
kulturor”. Papa kujtoi se detyra e Kongregatës për të mbrojtur integritetin
e fesë është mjaft delikate, prandaj duhet realizuar në bashkëpunim me barinjtë e
vendit e me Komisionet doktrinore të Konferencave të ndryshme Ipeshkvnore: “Puna
juaj përpiqet të ketë parasysh edhe kërkesat e dialogut konstruktiv, plot respekt
e durim, me Autorët. Nëse e vërteta ka nevojë për besnikërinë, kjo e fundit shtohet
për hir të dashurisë e ndihmës vëllazërore ndaj atij, që duhet t’i sqarojë, apo t’i
maturojë bindjet e veta”. Dikasteri për Doktrinën e Fesë, u tha Papa Françesku
pjesëmarrësve të asamblesë së përgjithshme, dallohet për frymën e kolegjialitetit
e të dialogut. Kjo frymë duhet bërë metodë pune brenda Kishës, në çdo nivel: “Jam
i sigurtë se sa më shumë kolegjialiteti të jetë tipar karakteristik i punës, aq më
shumë do të shkëlqejë para botës drita e fesë sonë. Në krejt shërbimin tuaj, uroj
ta ruani gjithnjë ndjenjën e thellë të gëzimit, të gëzimit të fesë, që e ka burimin
e pashterrshëm në Zotin tonë, Jezu Krishtin”.