Ուքրանիոյ Վարչապետին հրաժարականը անբաւարար կը նկատուի
ՔԻԵՒ, «Ռոյթըրզ».- Ուքրանիոյ խորհրդարանը Չորեքշաբթի, Յունուար 29ին սկսաւ քննելու վերջին
երկու ամսուան ցոյցերուն ընթացքին ձերբակալուածներուն ներում շնորհելու ընդդիմութեան
պայմանը՝ նկատի ունենալով, որ ընդդիմութիւնը անբաւարար նկատած էր վարչապետին հրաժարականը:
Ուքրանիոյ նախագահ Վիքթոր Եանուքովիչ ստորագրեց վարչապետ Նիքոլա Ազարովը պաշտօնէն հեռացնելու
մասին հրամանագիրը, որմէ առաջ Ազարով արդէն իսկ իր հրաժարականը ներկայացուցած էր: Ազարով
Մոսկուայի մօտիկ քաղաքական դէմք մըն է:Ուքրանիոյ խորհրդարանը, քաղաքական տագնապը լուծելու նպատակով, մէկ օր առաջ նաեւ չեղեալ նկատած էր ցուցարարներուն դէմ վաւերացուցած վիճայարոյց օրէնքները, որոնք աւելիով զայրացուցած էին ցուցարարները:
Միւս կողմէ, Ռուսիոյ նախագահ Վլատիմիր Փութին Չորեքշաբթի օր յայտարարեց, թէ պիտի սպասէ Ուքրանիոյ նոր կառավարութեան կազմութեան՝ Քիեւի խոստացուած 15 միլիառ տոլարի տնտեսական օժանդակութեանց ծրագիրը գործադրելէ առաջ:
| All the contents on this site are copyrighted ©. |