Пантыфік да аўстрыйскіх біскупаў: малітва – ваша першачарговая праца
У цёплай атмасферы
прайшла 30 студзеня 2014 г. сустрэча папы Францішка з аўстрыйскімі біскупамі, якія
прыбылі ў Ватыкан з візітам “ad limina Apostolorum”. Арцыбіскуп Вены, кардынал Крыстаф
Шонборн, і арцыбіскуп Зальцбурга, Франц Лакнэр назвалі спатканне “абнадзейлівым” і
“канструктыўным”. Францішак не чытаў загадзя падрыхтаванага тэксту прамовы, ён проста
ўручыў яго іерархам. Папа падзякаваў “за ўсё, што адбываецца ў Касцёле ў Аўстрыі”,
і заклікаў біскупаў быць побач з людзьмі і адносіцца да іх з міласэрнасцю. Пантыфік
– гэта “выдатны слухач, ён паказвае дарогу, але гэта не вуліца з аднабаковым рухам”,
- сказаў новы арцыбіскуп Зальцбурга. Святы Айцец заклікаў іерархаў да малітвы. “Ва
ўсіх вас ёсць шмат працы, але я прашу вас, не забудзьцеся пра малітву, гэта ваша першачарговая
праца”, - зацытаваў Пантыфіка арцыбіскуп Вены.
У канцы аўдыенцыі Папа ўручыў
кожнаму з іерархаў біскупскі крыж і ружанец.