Ժընեւի մէջ երէկուան բանակցութիւնները անելի մատնուեցան
Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմիի միջնորդութեամբ
Սուրիոյ կառավարական ու ընդդիմադիր պատուիրակութեանց միջեւ Ժընեւի մէջ երէկուան բանակցութիւններու
առաւօտեան նիստին ընթացքին անել կացութիւն մը ստեղծուեցաւ, որուն պատճառով ալ երեկոյեան
նախատեսուած Իպրահիմիի հետ անջատ հանդիպումները ջնջուեցան:Ընդդիմութեան պատուիրակութենէն Ռիմա Ֆլէյհան ԱՖՓ լրատու գործակալութեան յայտնեց, որ «վարչակարգը որեւէ նիւթի շուրջ չի գործակցիր, ո՛չ մարդասիրական հարցերու եւ ո՛չ ալ փոխանցման կառավարութեան հարցով»:
Իպրահիմի ընդունեց, որ բանակցութիւնները տակաւին «մեծ արդիւնք չտուին»: Ան նաեւ ըսաւ, որ Հոմսի մարդասիրական օժանդակութիւն հասցնելու փորձերուն մէջ բեկում չէ արձանագրուած` աւելցնելով, որ երկու պատուիրակութիւններուն միջեւ բանակցութիւնները այսօր պիտի շարունակուին:
«Բանակցութիւններուն մէջ մինչեւ հիմա որեւէ բեկում չարձանագրուեցաւ, սակայն այդ ուղղութեամբ կ՛աշխատին, ինչ որ լաւ է», ըսաւ ան:
Իպրահիմի յայտնեց, որ «Ռուսիա եւ Միացեալ Նահանգներ «Ժընեւ-2» խորհրդաժողովը յաջողութեամբ պսակելու հարցով լուրջ են, եւ ապագային պիտի ձգտինք գործակցելու Իրանի հետ, որպէսզի իր դերը կատարէ»:
| All the contents on this site are copyrighted ©. |