Аўстрыйскі кардынал: сустрэча з Папам – вялікі ўрок, як жыць паводле Евангелля сёння
Каля гадзіны 27 студзеня
2014 г. працягвалася спатканне папы Францішка з аўстрыйскімі іерархамі з Венскай касцёльнай
правінцыі. Канферэнцыя Біскупаў Аўстрыі знаходзіцца цяпер у Ватыкане з візітам “ad
limina Apostolorum”. Кардынал Крыстаф Шонборн, каментуючы сустрэчу, заявіў аўстрыйскаму
каталіцкаму агенцтву “Kathpress”, што яе здамінавала “неверагодна добрая, адкрытая
і сяброўская атмасфера”. “Папа з задавальненнем слухаў нас і падзяляў з намі турботы
і радасці”, - сказаў арцыбіскуп Венскі.
Францішак пытаўся аб становішчы моладзі
ў Аўстрыі, сітуацыі са святарскімі і манаскімі пакліканнямі. Ён падкрэсліў важнасць
сям’і, таму што гэта аснова грамадства, і заахвоціў іерархаў трымаць сем’і ў поле
зроку, садзейнічаць і падтрымліваць іх, “не асуджаць, але ў першую чаргу, уважліва
слухаць і прыглядацца”. Папа падзяліўся сваім досведам з Лацінскай Амерыкі, дзе сітуацыя
сужэнства і сям’і яшчэ больш драматычная, чым у Еўропе. Многія жылі разам без шлюбу,
тады нараджаліся дзеці і яны заключалі афіцыйнае сужэнства, некаторыя пазней і касцёльнае.
Гэта шлях для Касцёла – сур’ёзна паставіцца да такіх людзей, лічыць Святы Айцец.Задача
Касцёла – суправаджаць людзей, нават калі няма гатовага рашэння для ўсяго.
Падчас
сустрэчы абмяркоўваліся апошнія біскупскія прызначэнні ў Аўстрыі. Папа выказаў задавальненне,
што Касцёл у краіне вельмі жывы, хоць колькасць яго членаў зніжаецца.
“Мне
вельмі прыемна назіраць, што Францішак як пастыр мабілізуе, асвяжае і абнаўляе Касцёл”,
- сказаў кардынал Шонборн. Для яго сустрэча з Папам “стала вялікім урокам аб тым,
як жыць паводле Евангелля сёння”.