Ուքրանական տագնապ. ընդդիմութիւնը կը մերժէ Վարչապետի պաշտօնը ստանձնելու առաջարկը
Ուքրանական ընդդիմութեան ղեկավար Արսենի Եացենիուք նախագահ Վիքթոր Եանուքովիչի` զինք
վարչապետ նշանակելու առաջարկը մերժելէ ետք յայտնեց, որ բողոքի ցոյցերը պիտի շարունակուին: Եացենիուք
ըսաւ, որ ընդդիմութիւնը ընդհանուր առմամբ համաձայն է ղեկավարութիւնը ստանձնելու, սակայն
բաւարարութիւն պէտք է տրուի շարք մը կարեւոր պահանջներու, ներառեալ` նոր ընտրութեանց: Նախագահը
Եացենիուքի առաջարկած էր վարչապետի պաշտօնը, իսկ մէկ այլ ընդդիմադիր ղեկավարի` բռնցքամարտի
աշխարհի նախկին ախոյեան Վիթալի Քլիչքոյին` փոխվարչապետի պաշտօնը: Կիրակի օր արեւելեան
Ուքրանիոյ եւ մայրաքաղաք Քիեւի մէջ հազարաւորներ սգացին անցեալ շաբաթ սպաննուած ցուցարար
մը: Երէկ դարձեալ բախումներ տեղի ունեցան Քիեւի, Օտեսայի եւ Տնեփրոփեթրովսքի մէջ: Շաբաթ
օր ցոյցերը տարածուած էին դէպի աւելի հեռաւոր արեւելեան շրջաններ, ներառեալ` Քիեւի արեւմուտքը
գտնուող Վիննիցիա քաղաքը: