Եգիպտոսի ժամանակաւոր նախագահը կը յայտարարէ. «Նախագահական ընտրութիւնը տեղի պիտի ունենայ
խորհրդարանական ընտրութիւններէն առաջ»
Եգիպտոսի ժամանակաւոր նախագահ Ատլի Մանսուր յայտարարեց, որ որոշած է բարեփոխել ապագային
ճամբու քարտէսը` նշելով, որ «նախագահական ընտրութիւնը տեղի պիտի ունենայ խորհրդարանական
ընտրութիւններէն առաջ»: Մանսուր ըսաւ, որ «նախագահական ընտրութեան յանձնախումբէն պիտի
պահանջեմ թեկնածութեան առաջադրման սկիզբը յայտարարել»: Ան մամլոյ ասուլիսի մը ընթացքին
շեշտեց, որ «անհրաժեշտութեան պարագային հայրենիքը պաշտպանելու համար արտակարգ միջոցառումներ
որդեգրելու պիտի չտատամսինք»` աւելցնելով, որ «մենք հայրենիքի եւ քաղաքացիներու ապահովութիւնն
ու անդորրութիւնը պիտի պահպանենք»: «Հաստատութեանց վրայ վստահութիւնս ամուր է, եւ
անդուլ կերպով պիտի պայքարինք ահաբեկչութեան եւ զայն ղեկավարողներուն դէմ», ըսաւ Մանսուր`
աւելցնելով, որ «արդարադատութեան կոչ ուղղեցի արդարադատական կեդրոններուն թիւը աւելցնելու`
ահաբեկչութեան դատերու մէջ արդարութեան գործադրումը արագացնելու համար»: Մինչ այդ,
Եգիպտոսի առողջապահութեան նախարարութիւնը յայտարարեց, որ Եգիպտոսի մէջ, անեցեալշաբաթ
օր (25/1), տեղի ունեցած բողոքի ցոյցերէն ի վեր ընթացք առած բախումներուն պատճառով արձանագրուած
է առնուազն 49 զոհ եւ շուրջ 250 վիրաւոր: Եգիպտոսի ներքին գործոց նախարարութեան հրապարակած
տեղեկատուութեան համաձայն, 1079 մարդ ձերբակալուած է: Շաբաթ օր Եգիպտոսի տարբեր քաղաքներուն
մէջ բազմահազար մարդիկ ցոյցեր կատարեցին` նշելով երկրի նախկին նախագահ Հիւսնի Մուպարաքի
հրաժարականի 3-ամեակը: Անոնց մէկ մասը բողոքի ցոյցերով աջակցութիւն յայտնեց Եգիպտոսի
ներկայ իշխանութիւններուն, իսկ միւս մասը` յուլիսին գահընկէց եղած իսլամական նախագահ
Մոհամետ Մուրսիի: