Dita e Kujtesës. Papa: të mos përsëriten më tmerre të tilla, turp i njerëzimit
Kurrë më Shoah, turp i njerëzimit. Kështu shkruan Papa Françesku, në Ditën e Kujtesës
së shfarosjes së hebrenjve gjatë Luftës II Botërore, në një letër për mikun e tij,
rabinin e Buenos Ajresit, Abraham Skorka. Teksti lexohet sot në Auditoriumin “Parku
i Muzikës” së Romës, me rastin e koncertit “Violinat e shpresës”. Kjo mënyrë më
intime, me anë të një letre, u zgjodh kësaj radhe nga Ati i Shenjtë për të shprehur
afërsinë e tij me popullin hebraik. Kush ta dëgjojë muzikën e përvajshme të telave
të violinave, shkruan Papa për koncertin në kujtim të viktimave, “ta shohë vetveten
në ato lot historike, që sot vijnë tek ne përmes violinave e, ta ndjejë fort dëshirën
për t’u impenjuar, që tmerre të tilla, turp për njerëzimin, të mos përsëriten kurrë
më”. Publiku do të dëgjojë muzikë nga Vivaldi, Beethoven e kompozitorë të tjerë të
mëdhenj, shkruan Papa, nga dymbëdhjetë violina e një violonçel, mbijetuar nga koha
e Shoah-ut, secila me historinë e vet dramatike, të gjithë, gjetur e restauruar nga
mjeshtri izraelit, Amnon Vajnshtajn. Ndër to, një violinë, që i shoqëronte viktimat
në dhomat e gazit në Aushvic; një tjetër, e hedhur nga treni gjatë udhëtimit për në
kampin e përqendrimit, ruajtur nga një punëtor francez; të tjera, violina të muzikantëve
hebrenj, që në vitin 1936 lanë Gjermaninë për të formuar Orkestrën Filarmonike të
Palestinës e, pastaj, të Izraelit, të nxitur fort nga dirigjenti i famshëm italian,
Toskanini e nga historiani e filozofi francez, Huberman për t’i shpëtuar nga internimi.
Violinistët solistë janë përfaqësues të tre feve monoteiste, për të nënvizuar kështu
aftësinë bashkuese të muzikës. Dita e Kujtesës kremtohet edhe në Shqipëri e madje,
atdheu i shqipeve është një ndër vendet e para, që e shënon në kalendar. Gjatë luftës,
qindra e qindra hebrenj, që iknin nga vende të tjera të Evropës, ku kishte shkelur
këmba naziste, fshiheshin dhe mbroheshin në Shqipëri. Mjafton për këtë, dëshmia në
Muzeun e Holokaustit në Uashington, ku janë shkruar emrat e 2.264 hebrenjve, shpëtuar
nga shqiptarët. Mjafton edhe fakti, se sot e kësaj dite, hebrenjtë vijnë si turista
në Shqipëri, duke u kërkuar shoqëruesve shqiptarë t’i çojnë në vende të caktuara,
për të takuar njerëz, emrat e të cilëve i marrrin me vete e i kujtojnë si shpëtimtarë
të gjyshërve a të familjarëve të tjerë. Shpresojmë që sa më shpejt, të bëhet një studim
strukturor për sjelljen e popullit shqiptar ndaj hebrenjve, popull, që bashkë me Ditën
e Kujtesës së Shoah-ut, ka të drejtë të kremtojë edhe 6 marsin, Ditën e të Drejtëve,
për të nderuar kështu, traditën e mikpritjes e të besës, që e kanë karakterizuar në
shekuj.