Біскупскае пасвячэнне
прайшло сёння ў Мінску. Дапаможным біскупам Мінска-Магілёўскай архідыяцэзіі стаў кс.
Юрый Касабуцкі. Урачыстая св. Імша прайшла ў архікатэдральным касцёле Імя Найсвяцейшай
Панны Марыі, дзе сабраліся вернікі і ўсе іерархі Каталіцкага Касцёла ў Беларусі, у
тым ліку Біскуп Віцебскі Алег Буткевіч, які ўсяго тыдзен таму атрымаў сакру. Галоўным
кансэкратам сёння быў арцыбіскуп Тадэвуш Кандрусевіч, Мітрапаліт Мінска-Магілёўскі,
сакансэкратарамі – Біскуп Гродзенскі Аляксандр Кашкевіч і Біскуп Пінскі Антоній Дзям’янка.
Напачатку прагучаў гімн да Духа Святога, пасля чаго арцыбіскуп Клаўдыё Гуджэроці,
Апостальскі нунцый у Беларусі на лацінскай мове зачытаў намінацыйную булу Святога
Айца Францішка. У ёй Пантыфік падкрэсліў, што прыслухаўся да просьбаў арцыбіскупа
Тадэвуша Кандрусевіча аб прызначэнні дапаможнага біскупа, каб больш плённа здзяйсняць
служэнне ў Мінска-Магілёўскай архідыяцэзіі, улічваючы яе тэрыторыю і колькасць вернікаў.
У гаміліі Мітрапаліт Кандрусевіч падзякаваў папе Францішку за вялікую пашану
да Каталіцкага Касцёла ў Беларусі, адзначыўшы, што прызначэнне новых біскупаў, гэта
знак новага часу і новай надзеі. “Біскуп з’яўляецца прадстаўніком, пастаўленым Касцёлам,
самім Езусам Хрыстом праз Папу, і ён кіруе Касцёлам. Таму сённяшняя падзея – вельмі
значная для Беларусі. Мы будзем дзяліць функцыі з дапаможным біскупам Юрыем Касабуцкім.
Часам трэба быць у некалькіх месцах у адзін дзень і гэта вельмі скаладана, немагчыма.
Таксама ёсць і іншыя справы, прыходзяць людзі... таму мы падзелім абавязкі”, - растлумачыў
іерарх.
Святы Айцец Францішак напрыканцы лістапада прызначыў трох новых біскупаў
у Беларусь. І гэта стала сапраўды беспрэцэдэнтнай падзеяй. Як патрабуе ўрачысты абрад,
наміната запыталі перад народам, ці хоча ён захоўваць веру і выконваць свае абавязкі
– біскуп склаў абяцанні. Прагучала Літанія да Усіх Святых. Іерархі па чарзе ўсклалі
рукі на галаву новага біскупа, і прагучала малітва пасвячэння. Кс. Юрыю Касабуцкаму
была ўручана кніга Евангелля, ён здабыў таксама адпаведныя атрыбуты – пярсцёнак, мітру
і пастарал – адзнакі, якія сімвалізуюць пастырскую ўладу біскупа – наступніка Апосталаў.
У інтэрвь’ю дапаможны біскуп падзяліўся сваім бачаннем, якім павінен быць
біскуп і якія задачы ён асабіста ставіць сёння перад сабой. “Перш за ўсё, біскуп павінен
быць сябрам, не павінен быць дэспатам, не павінна быць вялікай адлегласці паміж біскупам
і іншымі людьмі. Я спадзяюся, усё так і застанецца і нічога не зменіцца. Мы будзем
разам несці слова Божае, толькі разам мы зможам паказаць усю прыгажосць Валадарства
Пана. Сапраўды, сучасны чалавек патрабуе Божай падтрымкі і я буду старацца несці Евангелле
людзям. У гэтым бачу задачу свайго служэння”, - сказаў біскуп Юрый Касабуцкі.
Мінска-Магілёўская
архідыяцэзія з’яўляецца роднай для Юрыя Касабуцкага, нарадіўся ён у Маладзечне. Скончыў
Вышэйшую духоўную семінарыю ў Гродне, ступень ліцэнцыята тэалогіі атрымаў у Люблінскім
каталіцкім універсітэце. Нёс служэнне і ў Магілёве, выкладае ў Вышэйшай междыяцэзіяльнай
семінарыі ў Пінску і тэалагічным каледжы імя св. Яна Хрысціцеля ў Мінску, апошнія
7 гадоў з’яўляўся пробашчам мінскай парафіі Найсвяцейшай Тройцы.
Сёння павіншаваць
новага біскупа прыйшлі родныя, блізкія, яго аднакурснікі і студэнты. “Ксёндз біскуп
– добры сябра, так было ў семінарыі і так ёсць у святарскім жыцці. Сёння тут у катэдры
больш за 10 чалавек – аднакурснікаў, усе мы вучыліся разам. Мы аднадумна жадаем шмат
сіл у нялёгкай працы. Бог, які абраў яго на гэтую пасаду, яго не пакіне. Жадаем трываць
у веры і чэрпаць сілы з верай у Хрыста”, - павіншаваў біскупа аднакурснік, кс. Дзмітрый
Барыла.
“Мы вельмі ўдячны Богу і папе Францішку за гэты выбар. Нам вельмі
прыемна, што кс. Юрый Касабуцкі стаў біскупам. Мы чэрпалі веды ад яго і спадзяемся,
што і далей будем атрымоўваць духоўную падрымку і веды ад новага біскупа”, - падзялілася
ўражаннямі Ірына Пушкарэвіч, студэнтка тэалагічнага каледжу.
“Трываць у Хрысце”
– гэты дэвіз узяў новы біскуп. Сёння ён разам з усімі адзнакамі і правамі біскупа
артымаў і абавязкі – быць сведкам Хрыста, абвяшчаць Божае слова, і галоўнае – несці
адказнасць не толькі перад Кацёлам мясцовым, але і Паўсюдным. Біскупу Юрыю Касабуцкаму
амаль 44 гады, дарэчы, праз тры тыдні ён сустрэне свой чарговы дзень нараджэння –
ужо ў новай якасці. На заканчэнне св. Імшы ён удзяліў прысутным сваё першае біскупскае
благаслаўленне.