Mesazhi i episkopateve evropiane në Javën e Lutjes për Bashkimin e të Krishterëve
Me rastin e Javës së Lutjes për Bashkimin e të Krishterëve, që do të përfundojë nesër,
presidenca e Konferencave Ipeshkvnore Evropiane (CCEE), mbledhur në Gjenovë të Italisë,
u bën thirrje të krishterëve të punojnë për ta dëshmuar së bashku Krishtin në të gjitha
fushat e jetës. “Krishti nuk mund të jetë i ndarë” , shkruhet në mesazhin e ipeshkvijve,
që i referohen temës së Javës. “Kjo është ftesë të mos e përdorim Krishtin për të
justifikuar mosmarrëveshjet e ndarjet tona. Krishti nuk është pronë personale, dhurohet.
Kërkimi e pranimi i mesazhit të krishterë nuk mund të mos çojë drejt dëshmisë së përbashkët,
drejt pranimit të dhuratave, që Zoti i ka dhënë secilit prej besimtarëve të vet, si
dhurata të gjithë Kishës. ‘Krishti s’mund të jetë i ndarë’ është provokim, që ta kumtojmë
katërcipërisht Lajmin e shëlbimit të njeriut. Është provokim për të mos e paraqitur
figurën e Zotit bërë njeri, si diçka që nuk i prek e madje i justifikon rehatitë tona.
‘Krishti s’mund të jetë i ndarë’ është nxitje për shoqëritë e Evropës, gjithnjë e
më tepër shumëfetare, ta dëshmojnë bashkërisht afërsinë e Hyjit me njeriun bashkohor.
‘Krishti s’mund të jetë i ndarë’ është thirrje për çdo evropian të mos e ndajë përmasën
fetare ndërmjet sferës publike e asaj private, të mos e përbuzë dhuratën e jetës,
duke vendosur vetë ç’jetë është e denjë për t’u jetuar, e të mos lejojë të udhëhiqet
nga iluzione të rreme, por t’i bëjë vend shpresës. E së fundi, shkruan presidenca
e Konferencave Ipeshkvnore Evropiane, ‘Krishti s’mund të jetë i ndarë” është siguri
se asgjë s’mund ta copëzojë dashurinë e Zotit për njeriun”. Në fund të mesazhit, ipeshkvijtë
e Evropës shprehin shqetësimin e tyre për gjendjen në Siri, në veçanti, për bashkësitë
e krishtera në vend, duke u bashkuar me lutjen për paqen të Papës Françesku.