Прадстаўнік Святога
Пасаду ўзяў удзел у дэбатах, якія прайшлі ў сядзібе ААН у Нью-Ёрку 20 студзеня 2014
г., на тэму сітуацыі на Блізкім Усходзе. Тэкст прамовы арцыбіскупа Фрэнсіса Чуліката
Апостальская Сталіца абнародавала 23 студзеня. Іерарх падкрэсліў, што аднаўленне
мірных перамоваў паміж ізраільцянамі і палестынцамі ўяўляе сабой пазітыўнае развіццё
і нагадаў нядаўнія словы папы Францішка, што абодва бакі павінны, пры падтрымцы міжнароднай
супольнасці, прымаць смелыя рашэнні.
Ватыканскі дыпламат нагадаў, што Святы
Пасад тэрмінова і неаднаразова выказваў сваю занепакоенасць мірам і дабрабытам усіх
народаў Блізкага Усходу і нагадаў заклік Пантыфіка да малітвы і посту ў інтэнцыі Сірыі.
Ён выказаў надзею, што канферэнцыя “Жэнева-2” стане падставай “да аднаўлення разважанняў
аб крытэрыях, неабходных, каб прапанаваць новы старт для гэтай выдатнай нацыі”. Папа
неаднаразова заклікаў міжнародную супольнасць не стаяць у баку ад праблем бежанцаў,
многія з якіх – хрысціяне. Іх зыход з’яўляецца таксама прычынай нестабільнасці на
Блізкім Усходзе, падкрэсліў арцыбіскуп Чулікат. Ён нагадаў занепакоенасць Пантыфіка
праблемамі ў Ліване і Іраку.
Прадстаўнік Святога Пасаду адзначыў, што выклікі
на Блізкім Усходзе з’яўляюцца для Арганізацыі Аб’яднаных Нацый заклікам да яе міратворчай
ролі і напамінам пра сэнс існавання гэтай міжнароднай структуры.