Ватыканскі дыпламат выступіў на канферэнцыі па Сірыі
22 студзеня 2014 г.
на мірнай канферэнцыі па Сірыі, якая пачалася ў швейцарскім Мантрё, выступіў пастаянны
назіральнік Апостальскай Сталіцы пры ААН і іншых міжнародных арганізацыях у Жэневе,
арцыбіскуп Сільвана Тамазі. Іерарх нагадаў, што дыялог павінен быць адзіным шляхам
для вырашэння сірыйскага крызісу. “Апостальская Сталіца пераканана, што насілле не
прывядзе нікуды акрамя смерці, разбурэнняў і адсутнасці будучыні”, - падкрэсліў ён.
Ватыканскі дыпламат нагадаў, што такога меркавання прытрымліваецца не толькі Каталіцкі
Касцёл, але і іншыя Цэрквы і рэлігійныя супольнасці.
Святы Пасад прапануе
тэрмінова спыніць ваенныя дзеянні і пачаць мірныя перамовы паміж бакамі, заклікае
скіраваць на гуманітарную дзейнасць грошы, прызначаныя на зброю, дапамагчы Сірыі ў
аднаўленні адукацыйных і медыцынскіх структур, праявіць міжнародную эканамічную і
духоўную салідарнасць з сірыйскім народам.
Арцыбіскуп Тамазі нагадаў заклік
Пантыфіка, перад абліччам сірыйскай трагедыі не закрывацца ва ўласных інтарэсах і
глядзець на бліжняга як на брата. “Не культура супрацьстаяння і канфліктаў будуе мірнае
жыццё народаў і паміж народамі, але культура сустрэчы і дыялогу. Гэта адзіны шлях
да міру”, - адзначыў прадстаўнік Апостальскай Сталіцы.