Thirrje e Papës për Konferencën e paqes mbi Sirinë: të mos kursehen përpjekjet për
t’i dhënë fund dhunës
Thirrje e Papës, sot paradite, në audiencën e përgjithshme, drejtuar Konferencës ndërkombëtare
për mbështetjen e paqes në Siri, që nisi në Montreux të Zvicrës: takim, kujtoi Papa,
i cili do të pasohet nga bisedimet, që do të zhvillohen në Gjenevë, duke nisur nga
24 janari. Papa Françesku, që i ka shumë për zemër fatet e popullsive tejet të vuajtura
të Sirisë, u lut për ta:“I lutem Zotit
t’i prekë zemrat e të gjithëve që, duke kërkuar vetëm të mirën e popullit sirian,
të vënë në prova të rënda, të mos kursejnë asnjë përpjekje për t’i dhënë fund sa më
shpejt dhunës e konfliktit, që ka shkaktuar tepër shumë vuajtje”. Për
Sirinë, e cila gjatë tre vjetëve pa më se 130 mijë bij të vdekur e miliona të tjerë
të shpërngulur, Papa kërkon hapa të vendosura drejt pajtimit, harmonisë e rindërtimit,
me pjesëmarrjen e gjithë shtetasve, duke i ftuar që… : “Secili ta shikojë
tjetrin jo si armik, jo si kundërshtar, por si vëlla, për ta mirëpritur e për ta përqafuar”. Ndërkaq
duhet thënë se në Montreux tensioni është i lartë. “E sotmja është ditë shprese të
brishtë, por konkrete”. Me këto fjalë e nisi fjalimin e tij Ban Ki-moon sekretar
i përgjithshëm i OKB-së. E ashpër, përgjigjja e delegacionit të Qeverisë siriane,
i cili nuk i kurseu akuzat drejtuar edhe të pranishmëve që, theksoi, nuk kanë kërkuar
asnjë farë rrugëzgjidhjeje për Sirinë. Opozita, me zërin e kryetarit të
Koalicionit kombëtar, u përgjigj, duke i ftuar të gjithë shtetasit sirianë ta braktisin
regjimin. John Kerry, sekretar i Shtetit amerikan, pranoi, në fjalimin e
tij, se Konferenca e Motreux i ka të gjitha kartat në rregull për të hapur rrugën
drejt paqes. Përfaqësuesja e lartë e BE-së, Ashton, kujtoi se ngjarjet në
Siri janë ‘tmerrësisht të pashembullta”. Shumë konkrete, ndërhyrjet e delegacionit
italian e atij francez: kërkuan ndalimin e menjëhershëm të zjarrit dhe hapjen e korridoreve
humanitare.