Siri: OJQ-të kërkojnë që të krishterët të përfaqësohen në “Gjenevën 2”
Të mbështetet pjesëmarrja e një delegacioni të pakicës së krishterë në negociatat
e paqes për Sirinë, të cilat të mbahen në konferencën e Gjenevës 2, duke filluar që
sot: kjo është kërkesa e OJQ-së “CitizenGO”, apelit të së cilës, sipas agjencisë Fides,
i janë përgjigjur udhëheqësit e Kishave dhe OJQ-të e akredituara pranë zyrës së OKB-së
në Gjenevë. Në apelin dërguar agjencisë Fides, lexohet: “Bashkësia e krishterë e këtij
vendi të Lindjes së Mesme ka qenë, dhe ndoshta është ende, grupi fetar më i goditur
nga lufta civile në vijim, në të cilën kryengritësit islamikë i kundërvihen regjimit
të Bashar al-Assad-it. Pas këtij konflikti pothuajse trevjeçar, rreth 2,6 milionë
sirianë të krishterë janë ende viktima të përndjekjes, dhunës dhe shantazheve, që
vënë në rrezik vetë ekzistencën e bashkësisë së krishterë siriane”. Në këtë skenar,
“fuqitë e mëdha botërore dhe Kombet e Bashkuara, që janë duke hapur tryezën e negociatave
të paqes mes grupeve në konflikt, nuk kanë menduar të ftojnë asnjë përfaqësues të
pakicës së krishterë (rreth 12% e popullsisë) në konferencën e paqes në Gjenevë”.
Për këtë arsye “CitizenGO” dhe disa OJQ të tjera mbështesin veprimin e “Christin Coalition
for Syria”, i cili propozon ndalimin e menjëhershëm të armiqësive dhe mbështet miratimin
e një Kushtetute demokratike, ku respektohen pakicat e shumta etnike e fetare, që
jetojnë në rajon. Me qëllim që këto pohime të dëgjohen, thotë teksti i apelit, “delegatët
e organizatës duhet të pranohen në negociatat e paqes në Gjenevë, gjë që deri tani
është u mohuar gjithnjë”. Kërkesa bëhet me bindjen se “liria fetare është e para ndër
të drejtat themelore të caktuara nga Deklarata universale e të drejtave të njeriut”
dhe kujton se në shumë raste “të krishterëve sirianë u mohohet e drejta elementare
e ushtrimit të lirë të besimit të tyre fetar”.