Në Shqipëri, del nga shtrati lumi Drin. Përmbyten toka e shtëpi
Shirat e vazhdueshme të ditëve të fundit kanë shkaktuar daljen e lumit Drin në Shqipëri,
si edhe të Gjadrit në Lezhë. Mëse 3500 hektarë tokë dhe 150 shtëpi kanë përfunduar
nën ujë. Ministri i Bujqësisë, Edmond Panariti, shkoi sot paradite në zonën e përmbytur
për ta ndjekur gjendjen nga afër. Sipas tij, përgjegjësia nuk bie vetëm mbi shiun,
por edhe mbi ndërprerjet e energjisë elektrike, që kanë bllokuar hidrovoret. Autoritetet
e vendit ankohen se lumi Gjadër nuk pastrohet që prej 25 vjetësh. Përmbytje ka
pasur edhe në veri të komunës së Bushatit, në zonën e Shkodrës, ku aktualisht, ndodhen
nën ujë 1500 hektarë. Shqetësuese, ngritja e nivelit të ujit në hidrocentralet mbi
lumin Drin. Vitet e fundit, në raste të tilla, është vendosur të hapen digat, duke
lejuar kështu përmbytjen e zonave të tëra, përfshirë Shkodrën.