Եկեղեցիներու համաշխարհային խորհուրդը կոչ կ՛ուղղէ Սուրիոյ մէջ արդար խաղաղութիւն հաստատելու
«Ժընեւ-2» խորհրդաժողովին` Սուրիոյ տագնապի լուծման վերաբերող Արամ Ա. կաթողիկոսի առաջարկը
միաձայնութեամբ որդեգրուեցաւ Եկեղեցիներու համաշխարհային խորհուրդի համաժողովին կողմէ`
իբրեւ հիմքը «Ժընեւ-2»-ին ուղղուելիք յատուկ յայտարարութեան: Յայտարարութեան մէջ ժողովին
մասնակիցները մասնաւորապէս կը նշեն. «Մենք կ՛անհանգստանանք բոլոր այն մարդոց համար, որոնք
տուժած են Սուրիոյ մէջ անխնայ բռնութեան եւ մարդկային աղէտին պատճառով: Անհամար թիւով
անմեղ երեխաներ, կիներ եւ տղամարդիկ կը սպաննուին, կը վիրաւորուին եւ կը հեռացուին իրենց
տուներէն: Մենք կոչ կ՛ուղղենք ձեզի` իբրեւ «Ժընեւ-2» խորհրդաժողովի մասնակիցներ, հետապնդելու
բոլոր զինեալ տագնապներու եւ թշնամութեան անմիջական դադրեցումը Սուրիոյ մէջ: Մենք կոչ
կ՛ուղղենք տագնապի բոլոր կողմերուն ազատ արձակելու ձերբակալուած եւ առեւանգուած անձերը:
Կը յորդորենք ՄԱԿ-ի Ապահովութեան խորհուրդին միջոցներ ձեռք առնելու` վերջ տալու Սուրիա
զէնքի եւ օտար զինուորներու հոսքին»: Խորհուրդը նաեւ կոչ կ՛ուղղէ ապահովելու, որ Սուրիոյ
բոլոր խոցելի համայնքները եւ դրացի երկիրներուն մէջ ապաստան գտած գաղթականները պատշաճ
մարդասիրական օգնութիւն ստանան, ինչպէս նաեւ զարգացնելու բազմակողմանի եւ ընդգրկուն հոլովոյթ
մը` արդար խաղաղութեան հաստատման եւ Սուրիոյ վերակառուցման համար: «Իբրեւ քրիստոնեաներ`
մենք միաձայն կոչ կ՛ուղղենք Սուրիոյ մէջ արդար խաղաղութեան հաստատման: Այս խաղաղութեան
հասնելու համար մենք պէտք է միասին աշխատինք մեր մահմետական քոյրերուն եւ եղբայրներուն
հետ, որոնց հետ ունինք ընդհանուր պատմութիւն, ինչպէս նաեւ հոգեւոր եւ ընկերային արժէքներ:
Մենք վստահութեան կառուցման միջոցով կը ջանանք աշխատիլ յանուն ազգային հաշտութեան եւ
ապաքինման»,- յայտարարեցին եկեղեցիներու Համաշխարհային խորհուրդի համաժողովին մասնակիցները: