«Ժընեւ-2»-ին մասնակցութեան համար Իրանի ուղղուած հրաւէրը լարուածութիւն կը ստեղծէ
ՄԱԿ-ի ընդհանուր քարտուղար Պան Քի Մուն Իրանը հրաւիրեց մասնակցելու «Ժընեւ-2» խորհրդաժողովին:
Ան ըսաւ, որ Իրանի արտաքին գործոց նախարար Մոհամետ Ճաւատ Զարիֆէն հաւաստիացում ստացած
է, որ Իրան բանակցութիւններուն ընթացքին կառուցողական դեր պիտի խաղայ: Իրանի արտաքին
գործոց նախարարութիւնը հաստատեց, որ ՄԱԿ-էն «Ժընեւ-2» խորհրդաժողովին մասնակցելու համար
պաշտօնական հրաւէր ստացած է եւ ընդունած զայն: Արտաքին գործոց նախարարութեան բանբեր Մուրտիա
Աֆխամ յայտնեց, որ «Իրան խորհրդաժողովին պիտի մասնակցի առանց նախապայմանի»: Պան Քի Մուն
երէկ ուշ գիշերին յետս կոչեց Իրանին ուղղուած իր հրաւէրը: Նախքան Քի Մունի որոշումին
հրապարակումը, ՄԱԿ-ի մօտ Իրանի մնայուն պատուիրակը յայտարարած էր, որ «եթէ «Ժընեւ-2»-ին
մեր ներկայութիւնը «Ժընեւ-1»-ի որոշումները ընդունելով պայմանաւորուած է` խորհրդաժողովին
պիտի չմասնակցինք»: Սուրիական ընդդիմադիր եւ յեղափոխական ուժերու Ազգային համաձայնական
մարմինը բուռն կերպով հակադարձելով յայտարարեց, որ «Ժընեւ-2»-ին պիտի մասնակցի այն ժամանակ
միայն, երբ Իրանի ուղղուած հրաւէրը յետս կոչուի, կամ Թեհրան «Սուրիայէն իր ուժերը հեռացնէ»:
Մարմինը նշեց, որ Իրան համաձայն չէ գտնուած «Ժընեւ-1»-ին, որուն վրայ պիտի հիմնուի «Ժընեւ-2»-ը:
Քի Մունի որոշումին լոյսին տակ Սուրիական ընդդիմադիր եւ յեղափոխական ուժերու Ազգային
համաձայնական մարմինը յայտարարեց, որ պիտի մասնակցի «Ժընեւ-2»-ին: Ազգային համաձայնական
մարմինը Պան Քի Մունին մինչեւ Կրինիչի ժամանակացոյցով ժամը 19:00 պայմանաժամ ճշդեց Իրանի
ուղղուած հրաւէրը յետս կոչելու` սպառնալով այլապէս չորեքշաբթի օր Զուիցերիոյ մէջ նախատեսուած
խորհրդաժողովին չմասնակցիլ: