Яшчэ адзін крок насустрач
адзін аднаму – у мінскім архікатэдральным касцёле Імя Найсвяцейшай Панны Марыі прайшла
экуменічная малітва. Яна сабрала, па традыцыі, католікаў, праваслаўных і пратэстантаў.
Кожны раз такія сустрэчы праходзяць па розным сцэнарыям. Сёлета ў касцёл унеслі крыж,
пасля чаго прадстаўнікі ўсіх хрысціянскіх канфесій Беларусі чыталі малітву, дарэчы,
і тэкст якой заўсёды рыхтуецца нанова. Потым, кожны з іх выступіў са зваротам да вернікаў.
Арцыбіскуп Тадэвуш Кандрусевіч заклікаў маліцца аб еднасці з Езусам. Нягледзячы на
шматлікія дасягненні і сумесную працу прадстаўнікоў розных канфесій, бар’еры паміж
імі яшчэ існуюць. Прычына падзелу – грэх, любы падзел – гэта рана, якую трэба лячыць.
Правядзенне Адзінага тыдню малітвы аб еднасці хрысціян у гэтым годдзе вельмі сімвалічна,
таму што супадае з важнымі гістарычнымі датамі, нагадаў іерарх.
“У гэтым годдзе
адзначаюцца два вялікіх юбілеі. 50 гадоў таму Папа Павел VI спаткаўся з Патрыярхам
Канстантынопальскім. Гэта сустрэча была першая ў гісторыі. Пасля Другога Ватыканскага
сабора гэта быў вельмі вялікі крок наперад у развіцці адносін паміж Каталіцкім Касцёлам
і Праваслаўнай Царквой. І таксама восенню мы будзем адзначаць 50-годдзе прыняцця Дэкрэту
Другога Ватыканскага сабора аб экуменізме, які даў новы імпульс у развіцці адносін
паміж Каталіцкім Касцёлам і іншымі хрысціянскімі супольнасцямі”, дадаў арцыбіскуп
Тадэвуш Кандрусевіч.
Традыцыя экуменічных малітваў з’явілася яшчэ ў XIX ст.,
а ў 1908 г. англіканскі святар прапанаваў прысвяціць тэме адзінства нават тыдзень.
З таго часу з 18 па 25 студзеня ва ўсім свеце праходзяць розныя мерапрыемствы – сумесныя
малітвы, сустрэчы, нават канцэрты ці іншыя праекты. Прадстаўнік Беларускай праваслаўнай
царквы, кіраўнік аддзелу адукацыі і катэхізацыі Мінскай епархіі святар Аляксандр Шымбалёў
задаў рытарычнае пытанне - як можна любіць Бога, якога ніхто не бачыў, але не любіць
свайго бліжняга? Любоў – галоўнае, што павінны несці хрысціяне незалежна ад канфесіі,
у храме ці ў паўсядзённым жыцці.
“Калі мы чуем, што ёсць розныя хрысціянскія
супольнасці, якія кажуць, што прымаюць Хрыста і Цела і Кроў Хрыста, але не маюць зносін
паміж сабой – гэта нейкае непаразуменне, якое ўзнікла ў прошлым. Па прычыне любові
да Бога і да чалавека мы павінны гэтае адзінства ствараць. Калі мы памятаем аб гэтым,
мы пачынаем рабіць. А вялікае ў малым здяйсняецца”, - нагадаў святар.
Пастар
евангелічна-лютэранскай супольнасці горада Гродна Уладзімір Татарнікаў падкрэсліў,
што ў сучасным жыцці занадта шмат праблем з якімі прыходзіцца сутыкацца хрысціянам,
і мы павінны адказваць менавіта разам на гэтыя выклікі. Таго, што хрысціян аб’ядноўвае
– больш, чым таго, што падзяляе, лічыць ён.
“Сабрацца разам парафіянам розных
канфесій і проста памаліцца – за сябе, за сваю сям’ю, зямлю, адзін за аднаго і адзін
з адным – гэта галоўнае. Мы адзіны ў духоўна-маральным выхаванні, у працы сацыяльнай
– гэта дапамога тым, хто мае патрэбу, барацьба са СНІДам”.
“Ці падзелены Хрыстус?”
– гэта пытанне і з’яўляецца тэмай сёлетняй малітвы, напрыканцы якой прадстаўнікі хрысціянскіх
канфесій запалілі лампады і паставілі іх каля крыжа. У гэтыя дні малітва аб’яднала
не толькі розныя канфесіі, але і больш за 70 краін свету, дзе нагадалі аб жаданым
адзінстве.