Папа Францішак атрымаў
запрашэнне наведаць сусветную выставу “ЭКСПА 2015”, якая з 1 мая па 31 кастрычніка
2015 г. будзе праходзіць у італьянскім Мілане пад дэвізам “Насыціць планету, энергія
для жыцця”. Святы Айцец прыняў на аўдыенцыі ў Апостальскім палацы дэлегацыю пад кіраўніцтвам
арцыбіскупа Міланскага кардынала Анджэла Сколы, у якую увайшлі прадстаўнікі касцёльных
і свецкіх структур задзейнічаных у падрыхтоўцы да падзеі. Сярод іх былі кардынал Джанфранка
Равазі, старшыня Папскай рады па культуры, Лучана Гуальдзэцці, віцэкамісар павільёна
Апостальскай Сталіцы, а таксама некаторыя арганізатары “ЭКСПА 2015”.
Падчас
аўдыенцыі кардынал Скола і кардынал Равазі пазнаёмілі Святога Айца з тым, як на выставе
будзе прадстаўлены Святы Пасад. Арганізатары падзеі патлумачылі яе сэнс і значэнне.
Пантыфік у сваю чаргу падтрымаў ініцыятыву і заклікаў працягваць падрыхтоўку да яе
звяртаючы ўвагу на “маленькія рэчы”, такія як дзяленне і дапамога. Ён быў станоўча
ўражаны магчымасцямі працы для моладзі, якія дае “ЭКСПА 2015”, а таксама міжнароднымі
праектамі.