Papa: T'i japim popullit të Zotit bukën e jetës, jo gjellë me helm
Shkandujt ndodhin në Kishë, kur marrëdhënia me Hyjin dhe me Fjalën e tij nuk është
e vërtetë. Kështu, meshtarët e korruptuar, në vend që të japin bukën e jetës, i japin
gjellë të helmuar popullit të shenjtë të Hyjit. Kështu tha Papa Françesku në homelinë
e mëngjesit, gjatë meshës në Shtëpinë e Shën Martës. Duke komentuar
leximin e ditës dhe psalmin përkatës, që flasin për shpartallimin e izraelitëve nga
ana e filistejve, Papa vërejti se populli i Hyjit në atë kohë kishte braktisur Zotin.
Thuhej se fjala e Hyjit ishte “e rrallë” në atë kohë. Prifti i vjetër Eliu, ishte
i vakët e bijtë e tij ishin të korruptuar, “e trembnin popullin dhe e fshikullonin”
. Izraelitët, për të luftuar kundër filistejve, përdornin arkën e besëlidhjes, por
e përdornin di diçka magjike, si “një gjë e huaj”. Dhe shpartallohen. Arkën e marrin
armiqtë. Mungon feja e vërtetë në Hyjin, në praninë e tij reale në jetë: “Kjo
pjesë nga Shkrimi i Shenjtë na bën të mendojmë si është marrëdhënia jonë me Hyjin,
me Fjalën e Hyjit: a është marrëdhënie formale? A është marrëdhënie nga larg? A hyn
Fjala e Hyjit në zemrën tonë, a na e ndryshon zemrën, a e ka këtë fuqi, apo jo? Mos
është nj marrëdhënie formale, gjithçka në rregull? Por zemra mbyllet ndaj asaj Fjale!
E na bën të mendojmë për disfatat e shumta të Kishës, për disfatat e popullit të Hyjit,
sepse nuk dëgjon Zotin, nuk e kërkon Zotin, nuk e lejon Zotin ta kërkojë. E pastaj,
pas tragjedisë, lutja, kjo lutje: ‘O Zot, po çfarë po ndodh? Na bëre të përçmueshëm
për të afërmit tanë. Tallje e shpoti për ata që na rrethojnë. Na bëre përrallë para
njerëzve. Popujt tundin kokën para nesh’”. Pastaj Papa kujton shkandujt e Kishës: “A
kemi kund turp? Sa shkanduj, që nuk dua t’i përmend një nga një, por të gjithë i dimë...
E dimë ku janë. Skandalet. Disa prej tyre kanë kushtuar shumë para: ashtu duhet! U
dashka bërë kështu... Turpi i Kishës! A kemi ndjerë turp për ato shkanduj, për ato
disfata të meshtarëve, të ipeshkvijve, të laikëve? Fjala e Hyjit, në ato shkanduj,
ka qenë e rrallë; tek ata burra e tek ato gra, Fjala e Hyjit ka qenë e rrallë. Nuk
kishin lidhje me Hyjin. Zinin një vend në Kishë, një vend me pushtet, edhe të rehatshëm.
Por Fjalën e Hyjit, jo! ‘Po unë mbaj një medalje’; ‘Po unë mbaj kryqin’... Po, si
ata që mbanin arkën! Pa marrëdhënie me Hyjin dhe me Fjalën e Hyjit! Më vjen ndër mend
fjala e Jezusit për ata që japin shkandull... E këtu është dhënë shkandull: rënia
e plotë e popullit të Hyjit, gjer në zvjerdhje, në korruptimin e meshtarëve”. Papa
Françesku e përfundon homelinë duke iu drejtuar popullit të Hyjit: “Të shkretët
njerëz! Të shkretët njerëz! Nuk u japim për të ngrënë bukën e jetës. Nuk u japim të
hanë – në ato raste – të vërtetën! U japim deri edhe gjellë me helm, disa herë! ‘Zgjohu,
pse fle, o Zot!’ Kjo duhet të jetë lutja jonë! ‘Zgjohu! Mos na largo përgjithmonë!
Pse e fsheh fytyrën tënde? Pse e harron mjerimin dhe shtypjen tonë?’ T’i lutemi zotit,
që të mos e harrojmë kurrë Fjalën e Hyjit, e cila është e gjallë, që ajo të hyjë në
zemrën tonë, e të mos harrojmë kurrë popullin e shenjtë e besnik të Hyjit, i cili
na kërkon gjellë të fortë!”.