У Ватыкане па асабістай просьбе папы Францішка размаўлялі пра сірыйскі канфлікт
За тыдзень перад жэнеўскай
міжнароднай канферэнцыяй, якая будзе прысвечана канфлікту ў Сірыі, палітыкі і эксперты
абмеркавалі 13 студзеня 2014 г. у Ватыкане магчымасці для спынення агню ў знішчанай
вайной краіне. Сярод тых, хто прымаў ўдзел у аднадзённым форуме быў таксама нобелеўскі
лаўрэат Махамед эль-Барадэі, адзін з вядучых егіпецкіх апазіцыйных палітыкаў і былы
генеральны дырэктар Агенцтва па атамнай энергіі МАГАТЭ. Арганізатарм канферэнцыі,
якая праходзіла за зачыненымі дзвярыма, выступіла Папская Акадэмія Навук, якая пажадала
ўнесці свой уклад у падрыхтоўку мірнай канферэнцыі ў Жэневе. У Швейцарыі, упершыню,
пройдуць перамовы паміж прадстаўнікамі сірыйскіх паўстанцаў і цяперашніх уладаў.
Ватыканская
канферэнцыя пад назвай “Сірыя – ці можна застацца абыякавым?” была арганізавана па
асабістай просьбе папы Францішка. Удзельнікі размаўлялі ў тым ліку пра пашырэнне міжрэлігійнага
дыялогу ў Сірыі і стварэнне пераходнага ўрада. Форум адкрыў кардынал Жан-Луі Таран,
старшыня Папскай рады па міжрэлігійным дыялогу. З Сірыі прыбыў халдэйскі епіскап Алепа
Антуан Адо.