Letër e Papës Françesku, kardinajve të rinj: kardinalati nuk është gradim, pranoje
me përvujtëri e thjeshtësi
Kardinalat nuk do të thotë gradim, as nderim, as stoli: është thjesht shërbim, që
kërkon t’i hapësh mirë sytë e ta zgjërosh zemrën. Kështu shkruan Papa Françesku në
një letër, drejtuar 19 kardinajve të rinj, pasi dha dje njoftimin për emërimin e tyre.
Por, ta lexojmë së bashku letrën e Papës, kardinajve: “Në ditën kur bëhet publik
emërimi yt si pjesëtar i Kolegjit Kardinalor, dëshiroj të të dërgoj një përshëndetje
të përzemërt, duke të siguruar, njëherësh, për afërsinë e lutjen time. Dëshiroj që,
si i përfshirë në Kishën e Romës, i veshur me virtytet e me ndjenjat e Zotit Jezus
(Rom 13,14), të më ndihmosh me dashuri vëllazërore në shërbimin tim ndaj Kishës
universale. Kardinalat nuk do të thotë gradim, as nderim, as stoli: është thjesht
shërbim, që kërkon t’i hapësh mirë sytë e ta zgjërosh zemrën. E, ndonëse duket si
paradoks, kjo mundësi për të parë më larg e për të dashur universalisht me më shumë
forcë, mund të fitohet vetëm duke ecur në udhën e Zotit: udhë e uljes, e përvujtërisë,
duke marrë formën e shërbëtorit(cfr Fil 2,5-8). Prandaj të kërkoj, a më mirë
të lutem, ta marrësh këtë emërim me zemër të thjeshtë e të përvuajtur. E, ndonëse
duhet ta bësh me gëzim e hare, bëje në mënyrë që kjo ndjenjë t’i rrijë larg çdo shprehjeje
të mendësisë së botës, çdo festimi të huaj për frymën ungjillore të thjeshtësisë,
të përkorjes, të varfërisë. Mirupafshim, pra, më 20 shkurt, kur do të fillojmë dy
ditët e reflektimit kushtuar familjes. Mbetem në dispozicionin tënd e, të kërkoj një
nder: të lutesh e t’i bësh edhe të tjerët të luten për mua. Jezusi të bekoftë e
Virgjëra e Shenjtë të mbroftë. Vëllazërisht,