Papa Françesku: përvoja e miqësisë ndihmon për pajtimin ndërmjet Kishave
Papa Françesku priti sot, në Vatikan, Komitetin Katolik për Bashkëpunim Kulturor me
Kishat Ortodokse dhe Kishat Ortodokse Lindore, me rastin e 50-vjetorit të themelimit,
me dëshirën e Palit VI. Në audiencë Papa nënvizoi se përvoja e miqësisë dhe e ndihmës,
nxit shpejtimin e hapit në udhën e pajtimit ndërmjet Kishave.
Koncili II
i Vatikanit nuk kishte përfunduar ende, kur Pali VI themeloi Komitetin Katolik për
Bashkëpunim me Kishat Ortodokse. Ati i Shenjtë u rikthye me kujtesë pikërisht 50 vjet
më parë kur, edhe me këtë nismë të pashembullt, Papa Montini fuqizonte impenjimin
ekumenik: “Udha e pajtimit dhe e vëllazërimit të përtërirë ndërmjet Kishave,
vulosur mrekullisht nga takimi i parë historik i Papës Pali VI me Patrikun Ekumenik
Atenagora, kishte nevojë edhe për përvojë miqësie e ndihme, që duhet të lindte nga
njohja reciproke e përfaqësuesve të Kishave të ndryshme e, në veçanti, e të rinjve,
që kishin nisur rrugën e shërbimit kishtar”. Sot, ashtu si 50 vjet më parë,
Komiteti u jep bursa studimi rregulltarëve e laikëve, ardhur nga Kishat Ortodokse
e Kishat Ortodokse Lindore, që dëshirojnë të kryejnë studimet teologjike pranë institucioneve
akademike të Kishës Katolike, duke mbështetur edhe projekte të tjera bashkëpunimi
ekumenik. Papa u shprehu mirënjohjen bamirësve si dhe vetë Këshillit drejtues
të Komitetit dhe i inkurajoi ta vijojnë misionin. Një përshëndetje e veçantë, të gjithë
atyre, që po kryejnë studimet teologjike në Romë. Prania juaj mes nesh, theksoi, ka
rëndësi të veçantë për dialogun ndërmjet Kishave të sotme e, sidomos, të nesërme: “Uroj
që secili nga ju të ketë një përvojë sa më të këndshme nga Kisha e nga Qyteti i Romës,
që ta pasuron shpirtin e kulturën. E uroj edhe të mos e ndjeni veten mysafirë, por
vëllezër ndërmjet vëllezërve. Jam i sigurt, nga ana tjetër, se me praninë tuaj, ju
jeni pasuri e vërtetë për bashkësitë e studimit, që frekuentoni”.