Լաւրով եւ Քերրի Փարիզի մէջ պիտի շարունակեն «Ժընեւ-2»-ի նախապատրաստական աշխատանքները
Ռուսիոյ արտաքին գործոց նախարարութիւնը հաղորդագրութիւն մը հրապարակելով ցաւ յայտնեց,
որ սուրիական ընդդիմադիր Ազգային համաձայնական մարմինը կը շարունակէ նախապայմաններ ներկայացնել`
աւելցնելով, որ ռուսական կողմը «Ժընեւ-2»-էն առաջ սուրիական կողմերուն հետ բարձր մակարդակի
շարք մը հանդիպումներ պիտի ունենայ: Նախարարութիւնը յայտարարեց, որ Ռուսիոյ արտաքին
գործոց նախարար Սերկէյ Լաւրով եւ Միացեալ Նահանգներու արտաքին գործոց նախարար Ճոն Քերրի
Փարիզի մէջ «Ժընեւ-2» խորհրդաժողովի նախապատրաստութեան միացեալ աշխատանքները շարունակելու
համաձայնութիւն գոյացուցած են: Միւս կողմէ, թրքական «Սապահ» օրաթերթի կայքը հաղորդեց,
որ Թուրքիոյ բանակի սպայակոյտը հրապարակած է յայտարարութիւն մը, որուն մէջ նշուած է,
որ Թուրքիոյ օդուժը ռմբակոծած է Սուրիոյ սահմանին վրայ գտնուող Քայիտա խմբաւորման զինեալները`
ի պատասխան հոնկէ արձակուած հրասանդի հրթիռներու: Երէկ առաւօտեան նշեալ զինեալները,
որոնք տեղակայուած են թուրք-սուրիական սահմանի սուրիական հատուածին մէջ, ռմբակոծած են
թրքական Աքչաքալէ բնակավայրը: Ռմբակոծման պատճառով մարդկային վնասներ չեն արձանագրուած: