Штодзённа жыць сакрамэнтам
хросту, які з’яўляецца не фармальнасцю, а сапраўдным пагружэннем у смерць і ўваскрасенне
Хрыста, заклікаў папа Францішак падчас традыцыйнай агульнай аўдыенцыі 8 студзеня 2014
г. Пантыфік адзначыў, што пачынае новы цыкл катэхез, прысвечаных сямі сакрамэнтам.
У першай з іх, Папа апавёў пра сакрамэнт хросту, які разам з Эўхарыстыяй і бежмаваннем,
утварае так званую “хрысціянскую ініцыяцыю” – чыніць з нас жывыя знакі прысутнасці
Бога і Яго любові. Між іншым, Пантыфік нагадаў, што ў нядзелю Касцёл будзе адзначаць
свята Хросту Пана. Хрост, паводле Святога Айца, гэта сакрамэнт, на якім грунтуецца
наша вера і які прышчэплівае нас як жывых членаў да Хрыста і Яго Касцёла. Але могуць
узнікнуць пытанні: ці сапраўды хрост неабходны для таго, каб жыць па-хрысціянску і
ісці за Езусам. Ці не з’яўляецца ён простым абрадам, фармальным касцёльным актам?
На іх Папа адказаў словамі св. Паўла: “Ці ж не ведаеце, што ўсе мы, ахрышчаныя ў Езуса
Хрыста, у смерць Ягоную ахрысціліся? Дык вось, мы пахаваныя разам з Ім хрышчэннем
у смерць, каб, як Хрыстус уваскрос з мёртвых дзеля славы Айца, так і нам хадзіць у
абноўленым жыцці” (Рым 6,3-4). “Такім чынам, гэта не фармальнасць! Гэта акт, які тычыцца
глыбіні нашага існавання. Ахрышчанае і неахрышчанае дзіця – гэта не тое самае. Ахрышчанае
і неахрышчаная асоба – не тая самая. Мы, праз хрост пагружаемся ў гэту невычэрпную
крыніцу жыцця і смерці Езуса, самы вялікі акт любові ва ўсёй гісторыі, і дзякуючы
гэтай любові можам жыць абноўленым жыццём, больш прабываць не ў зле, граху і смерці,
а ў адзінстве з Богам і братамі”, - сказаў Папа.
Францішак заклікаў жыць хростам
штодзённа, як актуальнай жыццёвай рэальнасцю, нягледзячы на тое, што для многіх ён
адбыўся ў далёкім дзяцінстве і ў памяці амаль не захавалася ўспамінаў пра гэту сакраментальную
падзею. Акрамя таго, Папа даў вернікам “хатняе заданне”: даведацца пра дату ўласнага
хроста і заўсёды памятаць пра яе, таму што гэта не меншае свята за Дзень нараджэння.
“Калі
мы здольныя ісці за Езусам і заставацца ў Касцёле, нават з нашымі абмежаванасцямі
і слабасцямі, так гэта менавіта дзякуючы сакрамэнту, праз які сталі новым стварэннем
і пераапрануліся ў Хрыста. Гэта сілай хросту мы былі пазбаўлены першароднага граху,
прышчэплены праз Езуса да Бога Айца, з’яўляемся носьбітамі новай надзеі (...), з’яўляемся
здольнымі прабачаць і любіць нават тых, хто на нас нападае і чыніць нам зло, з’яўляемся
здольнымі распазнаваць у апошніх і бедных аблічча Пана, які нас наведвае і становіцца
блізкім”, - нагадаў Папа.
Святы Айцец адзначыў, што ніхто не можа ахрысціцца
сам: заўсёды неабходны нехта, хто ўдзеліць сакрамэнт у імя Пана. “Хрост – гэта дар,
які перадаецца ў кантэксце клопату і братэрскага дзялення. Заўсёды ў гісторыі нехта
хрысціць іншага, (...) гэта ланцуг. Я не магу ахрысціцца сам, павінен папрасіць хросту
ў іншага. Гэта акт братэрства, акт далучэння да Касцёла. У яго цэлебрацыі мы можам
распазнасць самыя сапраўдныя ўказанні Касцёла, які як Маці працягвае нараджаць новых
дзяцей у Хрысце, у плённасці Святога Духа”, - адзначыў Пантыфік.
Папа заклікаў
прасіць Бога аб магчымасці штодзённа і глыбока адчуваць ласку, якую атрымалі падчас
хросту. Менавіта яна дазволіць іншым сустракаць у нас сапраўдных дзяцей Божых, сапраўдных
братоў і сясцёр у Хрысце, сапраўдных членаў Касцёла.