Papa Françesku, për vizitë në Shpellën e Betlehemit me personazhe të gjalla, në një
famulli romake. Flet famullitari
"Rroftë Jezusi, rroftë Jozefi, rroftë Maria!" Me këto fjalë, në Solemnitetin e Dëftimit
të Zotit, Papa Françesku përshëndeti sot pasdite, besimtarët e shumtë mbledhur në
kishën romake të shën Alfons Maria de’Liguorit, në Justiniana pranë Romës. Ati i Shenjtë
shkoi për të parë Shpellën e Betlehemit, krijuar nga besimtarët me personazhe të gjalla.
Një vizitë private, përgjigje për letrën, që besimtarët e kishës i dërguan Atit të
Shenjtë, duke e ftuar për këtë rast. Në këtë Shpellë Betlehemi, karakteristike për
Italinë, filluar si traditë në Greçio nga shën Françesku, merrnin pjesë rreth 200
figurantë. I shoqëruar nga kardinali vikar i Romës, Agostino Valini, Papa Bergolio
pa stendat e përgatitura, u lut në formë private e pastaj, përshëndeti të gjithë,
sidomos të sëmurët e fëmijët, në rreshtin e parë. Në orën 17.40, para se të largohej,
i siguroi besimtarët se "Jezusi mbetet gjithnjë me ne" e u kthye në Vatikan. Në mikrofonin
tonë, famullitari i kishës, don Dario Pompeo Criscuoli: Rasti për ta ftuar
Papën qe pikërisht Betlehemi me personazhe të gjalla, ku janë përfshirë shumë njerëz
të famullisë, por edhe protagonistë të tjerë. Duhet të them se të gjithë u përgjigjën
me entuziazëm ndaj ftesës sonë dhe u impenjuan jashtëzakonisht, sidomos disa artizanë
të famullisë e një arkitekt shumë i zoti. Shumë zdrukthëtarë, kovaçë… e pastaj, të
rinj e fëmijë, secili me rolin e vet: nga engjëlli tek bariu, e kështu, secili pati
vendin e vet në këtë Shpellë Betlehemi. Si ju lajmëroi Papa se do të vinte? Sigurisht
që na çuditi, sepse më telefonoi vetëm para tri ditësh, prandaj na u desh të organizonim
gjithçka në shumë pak kohë. U përgatitëm edhe shpirtërisht, me kremtimin e Eukaristisë,
së bashku me ipeshkvin dhe me lutje e adhurim, me këngë, lexime të Biblës e të shkrimeve
të Atit të Shenjtë. Kur ua thashë besimtarëve të famullisë, shpërthyen në britma gëzimi,
sepse e duan shumë Papën Françesku e mezi ç’prisnin ta shihnin nga afër. Ç’fryte
prisni pas kësaj vizite? Frytet janë gjithnjë ato të kthimit të zemrave kah
Zoti. …që njerëzit ta njohin Krishtin e të fillojnë një udhë rizbulimi të dobësive
të tyre e të dashurisë së Hyjit në jetën e përditshme.