Krishtlindja, në kryevepra proze. Gina Marzetti Noventa: “Ashja”
Në rubrikën Krishtlindja, në kryevepra proze, tregimi “Ashja”, shkruar nga
Xhina Marzetti Noventa, shkrimtare bashkëkohore italiane e njohur kryesisht për proza
të shkurtra, kushtuar botës së fëmijëve. Në qendër të vëmendjes është, pa dyshim,
Foshnja hyjnore, si në të gjitha rrëfimet kushtuar Këshndellave. Por edhe bima, që
në gjuhën shkencore quhet Ilex aquifolium, shqip ashe, një lloj dafine me gjethe të
ndritshme, të dhëmbëzuara e me gjemba të mprehtë. Çel lule të bardha, që pastaj shndërrohen
në farë të rrumbullakta, të kuqe flakë. Bën pjesë në familjen e shkurreve e njihet
si lulja tipike e Krishtlindjes, që skuq mbi dëborë, kur natyra bën gjumin e dimrit.
“Bariu
i vogël u zgjua papritur. Në qiell fekste një dritë e re, që s’ishte parë kurrë. Ai
u tremb, la vathin, kapërceu pyllin e doli në fushë të hapur, nën një kupë mahnitëse
qiellore. Nga lart, mbi tokën e mardhur, reshej kënga e korit hyjnor të engjëjve.
Me të, në shpirtin e tij zbriti edhe paqja. Kjo paqe e paprovuar kurrë mund të
zbresë vetëm nga qielli, mendoi, e i qeshi fytyra e njomë, me hundën picrrake të skuqur
nga acari. Frika qe mërguar nga zemra e tij prej fëmije, që di të kapet edhe me ujqër.
Papritmas u kthye e pa, i mrekulluar, se delet e kishin ndjekur pas. E me to, edhe
një mori njerëzish, që ngarendnin ngutshëm në drejtim të një shpelle. - Ku po shkoni
- i pyeti bariu i vogël. - Nuk e dike, a? - gjegji për të gjithë, një grua e re.
– Lindi Biri i Zotit. Zbriti ndër ne, për të na hapur portat e Parajsës. Bariu
i vogël u bashkua me turmën gazmore. Edhe ai donte ta shihte Birin e Zotit. Por s’kishte
kaluar as edhe një çast, kur zemra iu ndrydh nga trishtimi. Të gjithë ishin ngarkuar
me dhurata. Ndërsa ai nuk kishte ç’t’i dhuronte Foshnjës Hyjnore. U kthye, krejt i
ngrysur, kah stani, duke i grahur grigjës. Nuk kishte asgjë. Asgjë fare. As edhe një
lule. E ç’mund të dhurojë, kush nuk ka gjë tjetër, veç zemrës? Bariu i vogël nuk
e dinte se dhurata, që i pëlqente më shumë Krishtit Fëmijë, ishte pikërisht zemra
tij e vogël. Zemra e tij e mirë. Ahi! Gjembat ia shpuan këmbët e zbathura. U ndal,
pa tokën e lëshoi një britmë mahie, i mrekulluar. - Ah! Një gëmushë ende e gjelbër!
- brohoriti. Ishte një ashe, një lloj dafine me gjethe të ndritshme, të dhëmbëzuara
e me gjemba të mprehtë në maje. Kori i engjëjve dukej sikur i afrohej tokës. Gjithçka
për rreth ishte në festë. Si mund të durosh pa vrapuar atje ku lindi Foshnja Hyjnore,
edhe sikur të mos kesh asgjë për të dhuruar? Apo një gjë e ke? Bariu i vogël nuk
do të mungojë tek shpella hyjnore: një degë e blertë asheje do të jetë dhurata e tij.
Ja edhe shpella. Bariu i afrohet, i lum, por edhe i prekur thellë në shpirt, Ferishtes
Hyjnore, që duket sikur e pret, me buzë në gaz. Por, ç’ndodh? Pikat e gjakut në
duart e tij, shpuar nga ferrat, shndërrohen në rruzuj të vegjël, të kuq, përmbi degët
e gjelbra të shkurres, që kishte këputur për Jezusin. Në kthim, një e papritur
tjetër: i gjithë pylli skuqte nga topthat, ndërmjet gjetheve të ndritshme të asheve.
Që nga ajo natë misteri, ashja u dhurohet, në shenjë urimi, njerëzve më të dashur.
Madje është një nga dhuratat më të bukura edhe për Vitin e Ri. Ndoshta sepse duke
e këputur, mund ta stolisësh edhe me ndonjë pikë gjaku!”.