Այսօր ճրագալոյց է
Աստուածայայտնութեան: «Յայտնել » կը նշանակէ` ծածկուած բան մը երեւան հանել: Աստուածայայտնութիւն
կը նշանակէ թէ Աստուած որ աներեւոյթ է, ինքզինքը կը յայտնէ, լոյսի տակ կը դնէ: Աստուած
ինքզինք կը յայտնէ նախ իր արարծաներուն միջոցաւ, իր ստեղծագործութեամբ: Աստուած ինքզինք
յայտնած է նաեւ հրեշտակներու: Սակայն Աստուծոյ ամենամեծ յայտնութիւնը` Յիսուսն է: Յիսուս
Փիլիպեան կեսարիոյ կողմերը հասնելով յստակօրէն կը հարցնէ աշակերտներուն. « Ո՞վ կը կարծեն
մարդիկ թէ ըլլայ Մարդու Որդին»: Յիսուս իր ինքնութեան մասին է որ կը հարցնէ: «Ոմանք
պատասխանեցին. Յովհաննէս Մկրտիչ, ուրիշներ` Եղիան եւ Ուրիշներ Երեմեան կամ մարգարէներէն
մէկը»: Ուրեմն Ժողովուրդին մտքին մէջ, Յիսուս արտասովոր անձ մըն էր իր վարդապետութեամբ.
«կը սորվեցնէր իշխանութիւն ունեցողի պէս եւ ոչ թէ դպիրներուն նման»: Ան Բնութեան Տէրն
է. « Ո՞վ է ասիկա, որուն հովն ու ծովը կը հնազանդին իրեն»: Ահա ասոնք են պարզ ժողովուրդին
կարծիքները: «Իսկ դուք, ո՞վ կը կարծէք որ ըլլամ» հարցուց իր աշակերտներուն: Սիմոն
պատասխանեց. « Դուն ես Քրիստոսը կենդանի Աստուծոյ Որդին»: Ի՛նչ խոր պատասխան: Յիսուս
խօսք առնելով ըսաւ. « Երանի քեզի Սիմոն, որդի Յովնանի, որովհետեւ մարմինն ու արիւնը,
այսինքն քու տկար եւ սահմանափակ էութիւնդ իբրեւ մարդ, չտուին քեզի այդ յայտնութիւնը,
այլ Հայրս որ Երկինքն է»: Այլ իմաստով, Սիմոն արժանացաւ Հօր կողմէ մասնաւոր յայտնութեան,
որով ճանչցաւ Յիսուսի մէջ Աստուծոյ Որդին. ասոր համար ալ Յիսուս զինք երանելի նկատեց
եւ աւելցուց. « եւ ես կ՛ըսեմ քեզի. -դուն ես վէմը»: Յիսուս նոր անուն մը կը կերտէ եւ
կու տայ Սիմոնին` Վէմ. յունարէն Պետրոս: Յիսուս Պետրոսին կը յանձնէ եկեղեցական մեծ պատասխանատուութիւն
մը: Ան եկեղեցւոյ մէջ պիտի ըլլայ խորհրդանիշը ամրութեան ու հաստատակամութեան: Ան պիտի
դառնայ Եկեղեցւոյ վահանը դժոխքի բոլոր զօրութիւններուն դէմ: Ան պիտի ունենայ բանալիները
ճշմարիտ երջանկութեան, զոր աշխարհը չի կրնայ տալ ժողովուրդին: Յիսուս կու տայ Պետրոսին
եւ իրմէ ետք իր յաջորդներուն` սրբազան քահանայապետներուն կապելու եւ արձակելու իշխանութիւնը
. « Պիտի տամ քեզի Երկնքի Արքայութեան բանալիները. ինչ որ կապես երկրի վրայ` կապուած
պիտի ըլլայ երկնքի մէջ եւ ինչ որ քակես երկրի վրայ քակուած պիտի ըլլայ երկնքի մէջ»: Մէկ
խօսքով, Պետրոս եւ իր յաջորդները իշխանութիւն ունեցան բանալու կամ փակելու անցքը եւ մուտքը
Երկնքի արքայութեան, ուղղելով հաւատացեալներու հասարակութիւնը եւ որոշումներ տալով Եկեղեցւոյ
հայող բարոյական, ընկերային կամ աստուածաբանական հարցերուն շուրջ: Ուրեմն բացարձակ է
այս իշխանութիւնը, որուն սահմանը միայն Աստուած է եւ եկեղցւոյ նպատակը, իշխանութիւն ուսուցանելու
ճշմարտութիւնը, հաստատելու կամ ջնջելու եկեղեցական օրէնքներ, դատելու, պատժելու կամ շնորհելու,
արձակելու մեղքերն ու մեղաց պատիժները, մէկ խօսքով` իշխանութիւն կառավարելու բովանդակ
Եկեղեցին աստուածապարգեւ ճոխութեամբ: