2014-ի առաջին օրուան առաջին ժամերուն Հալէպի հայահոծ շրջաններուն մէջ տասնեակ հրասանդներ
եւ հրթիռներ աւեր գործեցին
«Բերիոյ նիուզ» կը հաղորդէ, որ Նոր տարին, Սուրիոյ մէջ դիմաւորուեցաւ տարբեր մթնոլորտի
մէջ, քան ինչ որ կը տիրէ ամբողջ աշխարհի մէջ:Սուրիա ապրողները եւ յատկապէս հալէպցիք ու մանաւանդ հայահոծ թաղերու բնակիչները մտահոգութեամբ, սակայն զգօն վիճակի մէջ կը պատրաստուէին լուրջ ժամեր դիմագրաւելու, արդէն չուշացաւ Նոր տարուան առաջին ժամերուն հրասանդներու ու հրթիռներու տեղատարափը:
Մէկ կողմէ հրասանդներ եւ հրթիռներ կ՛արձակուէին հայկական թաղամասերուն ուղղութեամբ, իսկ միւս կողմէ մերթ ընդ մերթ կը լսուէին տարբեր զէնքերու հրաձգութեան եւ ռումբերու ահեղ ձայներ:
Հետեւաբար, հալէպցիք 2014-ը դիմաւորեցին հրասանդներով եւ զանազան հրթիռներով: Բարեբախտաբար ֆիզիքական լուրջ վնասներ չարձանագրուեցան, միայն կատարուեցաւ քանդում եւ աւեր, արձանագրուեցան կարգ մը բնակարաններու եւ ինքնաշարժներու տարբեր աստիճանի վնասներ:
Ամբողջ Հալէպի ելեկտրականութեան հոսանքը երկու օր ամբողջովին անջատուած էր, իսկ կարգ մը շրջաններ ալ ջուրի լուրջ տագնապ կը դիմագրաւէին: 1 յունուար 2014-ի երեկոյեան ժամը 9:30-ին ելեկտրականութիւնը մօտ երկու ժամ միացաւ, իսկ ջրամատակարարումը կարգ մը տեղեր վերսկսաւ աստիճանաբար վերականգնիլ:
| All the contents on this site are copyrighted ©. |