Siri. Kryeipeshkvi i Halebit: Kisha i ndihmon të gjithë, pa dallim feje apo përkatësie
“Kisha është e pranishme në Haleb, pavarësisht nga bombat, uria dhe i ftohtit i këtyre
javëve. Dëshirojmë të jetojmë e të mbajmë fenë, duke treguar solidaritetin tonë me
të gjithë, pa dallim feje apo ndasie. Ky është misioni ynë, kjo është detyra jonë”.
Kështu pohoi për agjencinë AsiaNews Imzot Antoine Audo, kryeipeshkvi kaldeas i Halebit,
i cili përshkroi jetën e popullsisë së atjeshme në këto ditë Krishtlindjesh nën “shiun
e bombave”, që kanë shkaktuar më shumë se 500 të vdekur. Nuk kanë munguar, megjithatë,
gjestet e solidaritetit dhe të bashkimit ndërmjet të krishterëve e myslimanëve. Sipas
ipeshkvit, thirrjet e vazhdueshme të Papës për paqe i kanë ndihmuar meshtarët, prelatët
dhe laikët për të mos e humbur shpresën dhe për ta ruajtur besimin në Hyjin. “Më 25
dhjetor – tregon Imzot Audo – kanë rënë të paktën 12 bomba në lagje të ndryshme, kryesisht
në lagjet e krishtera, dhe kanë shkaktuar shumë viktima”. Ipeshkvi thekson se gjendja
është përmirësuar gjatë ditëve të fundit, por në qytet të varfrit janë shumë. Bombardimet
e regjimit dhe të kryengritësve, i ftohtit dhe çmimi i lartë i ushqimeve shkaktojnë
rritjen e urisë në popullsi. Edhe klasa e mesme është varfëruar: “Fatkeqësisht nuk
ia shohim fundin kësaj dhune – shpjegon kryeipeshkvi – askush nuk e di kur do të përfundojë
kjo luftë. Gjithçka mund të pranohet, por jo kjo rrëmujë, që nuk na lejon të shquajmë
asnjë rreze ndryshimi”. Kjo gjendje nuk i pengo të krishterët dhe Kishën për të vijuar
veprën e saj të bamirësisë dhe të lutjes për paqen në Siri. Pavarësisht nga shpërthimet
dhe nga rreziku për vdekje, qindra vetë kanë marrë pjesë në dy meshat e kremtuara
në katedralen kaldease më 24 dhjetor dhe në paraditen e 25 dhjetorit. Urrejtjet dhe
ndasitë, që po e dërmojnë shoqërinë siriane, nuk e kanë ndalur ndihmën për të varfërit
dhe për familjet e të shpërngulurve. “Gjatë këtyre muajve – thotë Imzot Audo –
mijëra familje të lagjeve dhe të fshatrave të periferisë së Alepos janë strehuar në
qendrën e qytetit, veçanërisht në lagjet e krishtera. Kisha i pranon të gjithë, pa
dallim, edhe pse nganjëherë disa të krishterë nuk e kuptojnë këtë hapje, që nuk bën
dallime ndërmjet feve dhe grupimeve politike”. Çdo ditë në lokalet e Kishës kaldease
Karitasi organizon një drekë dhe shpërndarjen e ushqimit për ët varfrit e të shpërngulurit
e zonës, kryesisht myslimanë. “Para disa ditësh – tregon kryeipeshkvi – një mysliman
i moshuar më ndiqte me vrap, duke më shprehur me zë të lartë mirënjohjen për punën
që po bëjmë dhe duke pohuar se ari i vërtetë shihet kur ka vështirësi. Për myslimanët
ky ar është dashuria bamirëse e të krishterëve”.