Papa kujton viktimat e një tragjedie që ndodhi në Argjentinë në vitin 2004
Ishte data 30 dhjetor 2004, kur flakët e përpinë lokalin “Kromanjon” të kryeqytetit
argjentinas, duke lënë 194 të vdekur. Papa Françesku i shkruan ipeshkvit përgjegjës
për baritoren sociale të Konferencës Ipeshkvore Argjentinase, Imzot Jorge Lozanos,
për të kujtuar të rinjtë që mbeten viktima dhe për të shprehur afërsinë me familjarët
e tyre: “Plagët dhembin edhe më shumë kur nuk trajtohen me butësi – shkruan Ati i
Shenjtë. – Duke kundruar Jezusin Foshnje, që është i gjithi butësi, kërkoj për ata
këtë qëndrim: të dinë t’i trajtojnë plagët me kujdes e butësi. Vetëm një ledhatim
plot butësi, nga zemra, në heshtje, me respekt, mund ta lehtësojë dhimbjen”. Në fund
Papa i drejtohet Zotit, që ta mbajë afër secilin, me ngushëllimin e tij të ngrohtë
prej Ati dhe t’i mësojë të gjithë të mos rrinë të vetmuar, por të kërkojnë shoqërinë
e vëllezërve. Letra e Papës Françesku u lexua dje në katedralen e Buenos Ajresit nga
Imzot Lozano, gjatë meshës së kremtuar nga kryeipeshkvi Imzot Poli.