Papa gjatë Mbrëmësoreve të Nënës së Zotit e Te Deum: solidaritet ndaj njerëzve të
varfër, të mjerë, të vuajtur
Në frymën e mesazhit për Ditën Botërore të Paqes, me temë“Vëllazërimi, themel
e udhë për paqen!” e të nxitjes së tij apostolike “Evagelii Gaudium” sonte, duke nisur
nga ora 17.00, Papa Françesku kryesoi, në Bazilikën e Shën Pjetrit Uratët e para mbrëmësore
të së Shenjtnueshmes Nënës së Zotit si dhe "Te Deum", falënderimin drejtuar Hyjit
në fund të vitit. Te Deum u kremtua në të gjitha katedralet e kishat famullitare të
botës katolike në frymën e lutjes e të meditimit për një vit që kaloi e një tjetër
vit që vjen, ngarkuar me ditët e veta ende të pajetuara. E sonte, pas kremtimit
të lutjeve të para mbrëmësore, kushtuar së Shenjtnueshmes Nënës së Zotit, Françesku
lartoi për herë të parë, në bazilikën e Shën Pjetrit, në emër të Kishës universale,
Te Deum, falënderim Zotit, nëpërfundim të një viti të pasur me hire, pa harruar
kobet e shkaktuara nga episodet e rënda të luftës e të dhunës. Papa e
nisi homelinë me fjalët e Shën Gjonit “Arriti ora e fundit” (1Gjn 2,18), nga
liturgjia e Meshës së 31 dhjetorit. Duke shpjeguar, menjëherë pas, se me ardhjen e
Zotit në histori, jemi tashmë në kohët “e fundme”, pas të cilave do të kalohet në
ardhjen e dytë e përfundimtare të Krishtit. Flitet për cilësinë e kohës, jo për sasinë,
sqaroi Ati i Shenjtë, duke pasur parasysh se me Jezusin, u plotësua koha, u plotësua
kuptimi, u plotësua shëlbimi. E nuk do të ketë më zbulesë, por manifestim të plotë
të asaj, që na zbuloi Krishti. Ky është edhe kuptimi i orës së fundit, sqaroi Ati
i Shenjtë. Çdo çast i jetës sonë është i fundmi e çdo veprim, përplot me amshimin.
Përgjigjja dhënë sot Zotit, që na do në Jezu Krishtin, ndikon fuqimisht mbi ardhmërinë
tonë. Nuk është ciklik, po linear, vizioni biblik e i krishterë i kohës, vijoi
Papa, është udhë, që shkon drejt përmbushjes. Viti i kaluar nuk na çon drejt një realiteti,
që përfundon, por drejt një realiteti, që kryhet; është hap i ri drej cakut, që kemi
përpara; cak shprese e lumturie, sepse do të takojmë Zotin, arsye e shpresës sonë
e burim i gëzimit tonë. Ndërsa viti numëron orët e fundit, Papa u drejtoi besimtarëve
ftesën: “T’i mbledhim, si në një shportë, ditët, javët, muajtë, që
jetuam, për t’ia dhuruar të gjitha Zotit. E ta pyesim veten; si e jetuam kohën, që
Ai na e dhuroi? E përdorëm kryesisht për vetveten, për interesat tona, apo ditëm ta
shkrijmë edhe për të tjerët? E sidomos, për Zotin? Sa kohë ruajtëm për të ndenjur
me Të, në lutje, në heshtje?”. Më pas, mendimi i Papës kaloi në Romë, dioqeza
e tij. E përshkroi si një mozaik, gurët e të cilit janë pikërisht banorët. Secili
me përgjegjësinë e vet në ngjarjet e vitit të kaluar e të atij, që do të vijë; në
cilësinë e jetës e të qytetarisë. Gjithçka varet nga ne të gjithë, kujtoi Ati i Shenjtë,
e jo vetëm nga autoritetet: “Roma është qytet me bukuri të pashoqe,
me pasuri shpirtërore e kulturore të jashtëzakonshme. E megjithatë edhe në Romë ka
plot njerëz, që jetojnë në mjerim të thellë material e moral, të varfër, të palumtur,
shpresëhumbur. Gjendja e tyre duhet të prekë jo vetëm ndërgjegjen e drejtuesve publikë,
por edhe të çdo qytetari. Në Romë ndoshta ndjehet fuqimisht kontrasti ndërmjet mjedisit
madhështor, ngarkuar me bukuri artistike, e mjerimit shoqëror”. Pa harruar
asnjë nga banorët e Qytetit të Amshuar, duke nisur nga turistët, për të kaluar tek
refugjatët e tek të papunët, që detyrohen të dërmohen për një pagë të padenjë, Papa
kërkoi për të gjithë, drejtësi e barazi, sepse secili ka dinjitetin e vet njerëzor. Një
meditim, pastaj, për këtë ditë të jashtëzakonshme të vitit: “Është dita e
fundit e vitit. Ç’do të bëjmë, si do të sillemi vitin e ardhshëm, për ta bërë pakëz
më të mirë, më human, më mikpritës qytetin tonë?”. Papa u kërkoi të gjithëve
të jenë më të vëmendshëm, më bujarë, të bashkëpunojnë me fymë solidare, për të mirën
e përbashkët. Roma e vitit të ardhshëm do të jetë më e mirë, vijoi Papa, nëse njerëzit
nuk do ta shikojnë vetëm nga larg, vetëm nga ’ballkoni’, pa u marrë fare me problemet
e shumta njerëzore, problemet e burrave e të grave që, duam s’duam, janë vëllezërit
tanë: “Në këtë perspektivë, Kisha e Romës e ndjen veten gjithnjë të impenjuar
për të dhënë kontributin e vet në jetën e ardhmërinë e qytetit; për ta frymëzuar me
tharmin e Ungjillit, për të qenë shenjë e mjet i mëshirës së Zotit”. Më
pas, falënderimi drejtuar Zotit për gjithë vitin e kaluar: “Sonte pëfundojmë
Vitin e Zotit 2013, duke e falënderuar e duke i lypur falje. E falënderojmë për të
gjitha të mirat, që na dhuroi, e posaçërisht për durimin e besnikërinë e Tij, që duken
në rrjedhën e kohës e sidomos, në përmbushjen e saj, kur Hyji dërgoi Birin e Tij,
të lindur nga gruaja (Gal 4,4)”. Nëna e Zotit, në emër të së cilës
nesër do të bëjmë një hap të ri në shtegtimin tonë tokësor, na mësoftë ta mirëpresim
Hyjin e bërë njeri, që çdo vit, çdo muaj, çdo ditë, të jetë përplot me dashurinë e
tij të amshuar”, përfundoi Papa. Në këtë liturgji të fundvitit, lavdërimi e falënderimi
drejtuar Zotit, shoqërohet edhe me një rrëmim të sinqertë të ndërgjegjes personale
e komunitare. Të gjithë i kërkojmë falje Zotit për mungesat e për fajet, të sigurt
se Hyji, i pasur me mëshirë, është pafundësisht më i madh se mëkatet tona. E pikërisht
“mëshira” është fjala që kemi dëgjuar më dendur në këto muaj papnie. E sonte,
duke iu drejtuar besimtarëve të dioqezës së tij të Romës, që mbushnin përplot Bazilikën
e Shën Pjetrit, Papa Françesku kremtoi “Te Deum”, Himn i falënderimit drejtuar Hyjit
për vitin 2013-të, që po perëndon e për 2014-tën që duket në horizontin e jetëve tona.
Në përfundim të Mbrëmësores, Ati i Shenjtë doli nga Bazilika e shkoi për të viztuar
Shpellën monumentale të Betlehemit, në Sheshin e Shën Pjetrit. Kujtojmë se sivjet
Shpella e Betlehemit, e vendosur si zakonisht tek këmbët eObeliskut, në kornizën
e shkëlqyer të Kolonatit berninian, titullohet: “Françesku 1223-Françesku 2013”. Hera
e parë që Sheshi i Shën Pjetrit shikon një Shpellë Betlehemi napoletane. E, duke u
nisur nga atmosfera e kësaj Shpelle, Papa Françesku i drejtoi sonte botës edhe urimet
për Vitin e Ri 2014. Nesër, më 1 janar, Ati i Shenjtë do të kryesojë Meshën e
Solemnitetit të të Shenjtnueshmes Nënës së Zotit, po në Bazilikën e Shën Pjetrit,
prej nga do të përhapet në mbarë botën mesazhi papnor për Ditën Botërore të Paqes
2014. Është një ditë, ndikimi i së cilës, sipas dëshirës së Papës, duhet të zgjatë
tërë vitin, e prandaj Ati i Shenjtë i fton të gjithë ta lexojnë mesazhin e të thellohen
në kuptimin e fjalëve që përbëjnë titullin e tij: “Vëllazërimi, themel e udhë për
paqen!”.