Katolikët e Koresë së Jugut “duhet të luten në mënyrë të veçantë për vëllezërit dhe
motrat e Veriut, që Zoti t’i bekojë me begati, t’u japë dashuri, përdëllim e hir”.
Kështu shkruan Kryeipeshkvi i Seulit, Imzot Andrea Jeom Su-Jung, në mesazhin drejtuar
besimtarëve me rastin e Vitit të Ri: “Të dashur vëllezër e motra, t’i urojmë mirëseardhjen
2014-ës me shpresë e me shumë ëndrra. Zoti ju ndenjtë pranë çdo ditë të këtij vitit
të ri!”. Në tekstin e shpërndarë nga agjencia AsiaNews, prelati shkruan: “Të gjithë
shpresojnë për një jetë të lumtur, por lumturia e vërtetë ndodhet brenda gjendjes
shpirtërore të secilit. Nëse jemi mirënjohës për çfarë kemi dhe nëse e ndajmë me të
tjerët, mund ta gjejmë lumturinë fare lehtë: duke jetuar me dashurinë për të tjerët”.
Megjithatë, shton Kryeipeshkvi i Seulit, “shumë njerëz e kanë të vështirë të jenë
të lumtur, sepse janë tepër të babëzitur e të përqendruar tek vetvetja. Për këtë arsye
Krishti ka përkufizuar të ‘lumë të varfrit në shpirt’. Duhet të jetojmë një jetë të
përvuajtur e duhet ta vëmë në duart e Hyjit. Kjo është e vërteta, çelësi i lumturisë,
që nuk duhet ta harrojmë kurrë”.