Новапрызначаннаму
Біскупу Віцебскаму Алегу Буткевічу дасталася багатая – гістарычна і духоўна – спадчына.
Віцебская дыяцэзія была заснавана ў 1999 годзе, па апошніх дадзеных налічвае 137 парафій
і больш за 150 тыс. католікаў. І калі складаныя гады адраджэння рэлігійнага жыцця
ў Беларусі ззаду, то наперадзе – не менш складаная праца. Як адзначыў адразу пасля
прызначэння Біскуп Віцебскі ў інтэрв’ю Беларускай рэдакцыі Ватыканскага радыё, секулярызм
і рэлятывізм – адны з галоўных праблем, якія стаяць сёння перад Касцёлам у Беларусі.
Місія Касцёла патрэбна нават у самых далёкіх кутках краіны. Напрыклад, у мястэчку
Лёзна Віцебскай вобласці – у 10 кіламетрах ад мяжы з Расіяй.
З аднаго боку,
за доўгія гады савецкай улады многія людзі адышлі ад веры, хаця мясцовыя жыхары каталіцкага
веравызнання тут засталіся. З іншага – некаторыя, магчыма, забыліся пра Бога, бо доўгі
час не мелі ні храма, ні сістэматычнага духоўнага жыцця, адзначыў кс. Алег Півавар,
пробашч парафіі св. айца Піо ў Лёзна. “Я бачу, што ёсць перспектывы, ёсць над чым
працаваць. Шмат людзей неахрышчаных, шмат людзей, якія адышлі ад Бога, таму што былі
выхаваны ў часы пераследу і атэізму. А яны ўсе патрабуюць Бога, нават калі некаторыя
і не ўсведамляюць гэтага. Таму будзем працаваць на ніве Панскай, няхай Бог дае нам
сваё благаслаўленне”, - сказаў ён.
Парафія св. айца Піо была заснавана ў 2001
г. па благаслаўленні Біскупа Віцебскага на пенсіі Уладзіслава Бліна. Гістарычна ў
Лёзна ніколі не было каталіцкага храма. Прычын таго шмат. Большасць насельніцтва ў
Лёзна складалі яўрэі. Тут было чатыры сінагогі і толькі дзве праваслаўныя цэрквы.
У 1772 г., пасля падзелу Рэчы Паспалітай, Лёзна ўвайшло ў склад Расійскай імперыі
– аб існаванні каталіцкай супольнасці не магло ісці нават і мовы. Да таго ж і сёння
гэта самы ўсходні райцэнтр Беларусі.
Парафія св. айца Піо аб’яднала і мястэчка,
і ўвесь раён, у акрузе некалі былі каталіцкія храмы, паведаміў кс. Алег Півавар. “Калі
гістарычна, то ў раёне існавалі аж дзве каталіцкія парафіі. Адна налічвала 2,5 тыс.
католікаў, а другая – 1,5 тыс., а таксама каплічкі, да якіх даяжджалі святары. Каплічкі
наведвалі таксама 300-400 чалавек. Але потым ўсё гэта было знішчана”, - падзяліўся
святар.
З 2010 г. у Лёзна будуецца сапраўдны душпастырскі цэнтр. Калі на пачатку
парафіянаў можна было на пальцах дзьвух рук пералічыць, то сёння іх колькасць ўзрасла
ў разы. Усяго за тры гады з’явіліся і сцены цэнтра. Гэта нешта большае, чым проста
парафіяльны храм, і запатрабаванне ў гэтым ёсць, падкрэсліў кс. Алег Півавар. “Гэта
будзе касцёл, памяшканне для катэхезы, пакоі для святара, таксама гасцявыя пакоі для
тых, хто праязджае міма. Тут недалека ў Расіі – і Смаленск, і Катынь, куды прыязджаюць
пілігрымкі з Польшчы, і пілігрымы змогуць тут спыніцца. Таксама душпастырскі цэнтр
будзе праводзіць летнікі для дзяцей, так званыя “Канікулы з Богам”, а таксама дапамагаць
хворым. Гэта мы зможам рабіць, калі цэнтр пачне функцыянаваць”, - сказаў мясцовы пробашч.
А ячшэ супрацоўнічаць з дзіцячымі дамамі, дапамагаць людзям з абмежаванымі
магчымасцямі і шмат іншага – усё гэта ў будучым. Зараз жа парафія расце – хоць і на
два чалавекі ў год, але не ў колькасці, як вядома справа. Зусім нядаўна тут пачалі
праводзіць катэхітычныя заняткі для дзяцей. Гэта ўжо іншая гісторыя – як навяртання
людзей да Бога, так і выхавання новага пакалення ў традыцыях хрысціянскіх каштоўнасцяў.
У наступным годзе у парафіі св. айца Піо трое дзяцей прымуць Першую Святую Камунію.
Адраджаць веру ніколі не рана і ніколі не позна, як і пачынаць з нуля.