Італьянскі тэолаг: хрысціян пераследуюць, бо Евангелле незручнае
Каментуючы словы папы
Францішка пра дыскрымінацыю і пераслед хрысціян з прычыны іх веры, прамоўленыя перад
малітвай “Анёл Панскі” 26 снежня 2013 г., у свята св. Стэфана – першага мучаніка Касцёла,
арцыбіскуп Кьеці-Васты Бруна Фортэ нагадаў, што для многіх Евангелле з’яўляецца незручным.
Вядомы італьянскі бібліст і тэолаг, перакананы, што яно, “уводзіць у крызіс спажывецкую
і эгаістычную ментальнасць і звычкі, якія закрываюць вочы на пакуты слабых і бедных
і апраўдваюць эгаізм і злоўжыванні некаторых”. Таму, натуральна, што існуе адмаўленне
Евангелля і напады, якія з’яўляюцца “формай абароны ўласнага алібі і прывелеяў перад
тымі, хто жыве Евангеллем” і верыць у яго, адзначыў іерарх.
На думку арцыбіскупа
Фортэ, праявамі такіх тэндэнцый з’яўляюцца парушэнне свабоды сумлення, навязванне
так званага адзінага мыслення ў сферы адукацыі моладзі і нават самых маленькіх дзяцей,
навучанне журналістаў “нейтральнай мове”.
Паводле іерарха, перад абліччам такой
сітуацыі нельга стамляцца выкрываць розныя формы устанаўлення манаполіі мыслення –
“манаполіі інструменталіскай і эгаістычнай” – і працягваць, з глыбокай свабодай, абвяшчаць
Евангелле і даваць сведчанне аб ім. “Панаванне ўсеахопліваючых ментальнасцяў, якія
выключаюць арыгінальнасць, свабоду сумлення і свабоду рэлігійнага вызнавання, было
б цяжкай пагрозай усяму чалавецтву”, - сказаў італьянскі тэолаг. Ён лічыць, што сёння,
хрысціяне, як ніколі павінны адчуваць пакліканне да сведчання веры з пакорай і адвагай,
без крыўдаў, з сілай прабачэння да ўсіх і пастаянствам.