Bashkësia e Tezesë: në Strasburg të rinjtë e mbarë Evropës
Më se 20 mijë të rinj nga mbarë Evropa, e edhe nga kontinentet e tjera, do të arrijnë
më 28 dhjetor në Strasburg, për etapën e 36-të të shtegtimit të besimit, organizuar
nga Bashkësia e Tezesë. Ndërmjet të rinjve, 4500 janë polakë, 2600 ukrainas, 1400
italianë, 1200 kroatë, 1000 biellorusë… Së bashku me të rinjtë e Alsasës e të zonës
gjermane të Ortenaos, që do t’i mikpresin, do të jenë 30 mijë të rinj, pjesëmarrës
në këtë takim të paharrueshëm rinor. Së bashku, nga mbarë bota, djem e vajza në lule
të rinisë, për të kremtuar me lutje e hare rinore, Vitin e Ri 2014. Përmes katër
propozimeve për 2014-tën, që do t’i marrin sapo të arrijnë, vëllai Alois, i pari
i Tezesë, u kujton: “Ata, që e duan Krishtin në mbarë botën, formojnë një bashkësi
të madhe miqësie. Mund të japin një kontribut të pallogaritshëm, për të shëruar plagët
e njerëzimit. Pa dashur t’i detyrojmë, mund të favorizojnë solidaritetin botëror,
që nuk përjashton asnjë popull, asnjë njeri”. Çdo mëngjes, kujtohet në faqen
e internetit të Bashkësisë së Tezesë, të rinjtë do të mblidhen në më se dyqind famulli
mikrpritëse, në të dy brigjet e Renit, në Francë e në Gjermani, për një çast lutjeje,
gëzimi, jete të përbashkët. Sipas programit, nesër, 28 dhjetor, do të arrijnë
pjesëmarrësit, të cilët do të mikpriten në familje e, në mbrëmje, do të mblidhen për
një çast lutjeje të përbashkët në vende të caktuara. E diela do të hapet me
meshë në famullitë mikpritëse, ndërsa pasdite, në pika të ndryshme të qytetit, do
të mbahen takime kushtuar përshpirtërisë, temave shoqërore, historisë dhe artit në
Evropë. Në mbrëmje, një çast tjetër lutjesh të përbashkëta në parkun e Ekspozitave
të Vaeken. Të hënën, më 30 e të martën, më 31 dhjetor, programi parashikon
çaste lutjesh për paqen dhe “festën e popujve”, që do të kremtohet në famullitë mikpritëse.
Më 1 janar, pas drekës së fundit në familje, të rinjtë pjesëmarrës do të rikthehen
në vendet e tyre, përplot me mbresat e takimit të Strasburgut, duke ëndërruar takimin
e ardhshëm, të 37-tin, pas një viti, në një vend, që do ta njohin para se të nisin
përsëri shtegtimin drejt viseve të tyre, me aromën e lutjes, të miqësisë, të vëllazërimit.