Երկուշաբթի, 23 դեկտեմբեր, Սուրբ Ծննդեան ճրագալոյցի նախօրեակին, Ֆրանչիսկոս Սրբազան
Քահանայապետը, առաւօտեան ժամը 10,30-ին, իր գրասենեակին մէջ ընդունեց` Քուպայի Վատիկանի
մօտ նոր նշանակուած դեսպան` Տիար Ռոտնէյ Ալէխանտրօ Լոբէզ, հաւատարմագրերու ներկայացումի
առթիւ։ Ապա ժամը 11-ին, Նորին Սրբութիւնը յաջորդաբար ընդունեց` Արեւելեան Ժողովի
Կառավարիչ` Կարտինալ Լէոնարտօ Սանտրին եւ ''Օփուս Տէյ'' միաբանութեան առաջնորդ` Կարտինալ
Խավիէ Էչէվարրիա Րոտրիկէզ, հուսկ ժամը 12-ին, յատուկ ունկնդրութիւն շնորհեց Նափոլի Թեմի
Արքեպիսկոպոս` Կարտինալ Գրէշենցիօ Սեփէի ու անոր գլխաւորած պատուիրակութեան, որուն մաս
կազմեցին Արքեպիսկոպոսական Թեմի անդամներ, Քամբանիա նահանգի ներկայացուցիչներ, ինչպէս
նաեւ ''Գանդոնէ է Գոսդապիլէ'' աշխատանոցի եւ Սուրբ Պետրոսի հրապարակի Մսուրը կառուցող
ընկերութեան պատասխանատուներ։ Յայտնենք որ այս տարի, առաջին անգամուան համար, Նափոլիի
մսուրներու հռչակաւոր աշխատանոցներէն մին` ''Գանդոնէ է Գոսդապիլէ'', որ 1960էն ի վեր
կը գործէ, Նափոլիի Արքեպիսկոպոսի միջոցաւ, Ֆրանչիսկոս Քահանայապետի նուիրած են Սուրբ
Պետրոսի հրապարակի վրայ այս տարուայ զետեղուած հսկայական մսուրի 16 արձանները մինչ մսուրի
շինարարութիւնը յանձնուած է այլ ընկերութեան մը որ առատաձերն բարերարներու օժանդակութիւններուն
շնորհիւ կառուցած է զայն։ Նորին Սրբութիւնը ապա ժամը 12,15 անց ընդունեց գերապայծառ
Բէտրօ Լոբէզ Քուինդանա, Քանատայի մօտ առաքելական նուիրակ։