Пантыфік правёў тры гадзіны з хворымі дзецьмі

Амаль тры гадзіны доўжыўся візіт папы Францішка ў ватыканскі дзіцячы шпіталь “Bambino Gesu” 21 снежня 2013 г. Сустрэчу з хворымі дзецьмі, іх сем’ямі і медыцынскім персаналам каментатары ўжо назвалі адной з самых кранальных падчас гэтага пантыфікату. “Было сказана няшмат слоў, але сардэчныя жэсты Папы назаўжды застануцца ў нашых сэрцах”, - прызнаўся капелан бальніцы, кс. Луіджы Дзукара. Святога Айца прывіталі малыя пацыенты з мышачнай дыстрафіяй, перасаджаным сэрцам і лейкеміяй, якія паходзяць з розных частак свету. Візіт Францішка пачаўся з аддзялення інтэнсіўнай тэрапіі. Ён маліўся там за здароўе дзесяці дзяцей у вельмі цяжкім стане. Урач-ардынатар, які суправаджаў Пантыфіка, прызнаўся, што Святы Айцец быў яўна ўсхваляваны і стараўся пабыць як мага даўжэй ля кожнага ложка. Ён не пагадзіўся на прамую трансляцыю свайго візіту, падкрэсліўшы, што гэта яго асабістая сустрэча з хворымі дзецьмі.

У шпітальнай капліцы Папа маліўся з анкалагічна хворымі. Ён атрымаў ад іх поўны кошык дзіцячых мар і малітваў. Дзеці пісалі аб падзяцы для ўрачоў, якія ратуюць іх жыцці, пра жаданне знайсці лекі ад усіх хвароб і канчаткова спыніць цярпенні. “Мне ўжо надакучылі ўколы”, - напісаў Дыега. Флавія папарасіла Святога Айца: “Дапамажы нам неяк перажыць гэтыя цяжкія часы”.

“Дарагія дзеці, дзякую вам за вашы мары і малітвы, якія вы змясцілі ў кошыку, што я атрымаў ад вас. Вялікі дзякуй!”, - сказаў Святы Айцец. Ён запрасіў прадставіць іх усе Езусу, які “ведае іх лепш за нас”. “Ён ведае сапраўдную глыбіню нашых сэрцаў. Асабліва з вамі, дарагія дзеці, Езус застаецца ў асаблівых адносінах: Ён заўсёды побач з вамі!”, - дадаў Папа і запрасіў дзяцей разам памаліцца “Вітай, Марыя”.

Падчас візіту Пантыфік атрымаў сімвалічныя ключы да “Дому Францішка”. Гэтая новая структура, якая дзейнічае пры бальніцы, для маці ў цяжкай эканамічнай, сацыяльнай і сямейнай сітуацыі. Яна прапануе кругласутачную падтрымку жанчынам, якія вымушаны бегчы ад насілля ці ня маюць сродкаў для клопату пра сваіх дзяцей. Дзверы “Дома Францішка” адкрыты для маці і іх дзяцей, незалежна ад краіны паходжання і веры. Аб’ект працуе ў супрацоўніцтве з рымскай “Caritas”.

Святы Айцец наведаў розныя аддзяленні найбуйнейшай дзіцячай бальніцы ў Еўропе. Яна па-ранейшаму знаходзіцца пад апекай Святога Пасаду і размешчана недалёка ад Ватыкана.