Քրիստոսի հիմնած Եկեղեցին զինք բնորոշ իր յատկանիշերն
ունի, առանց որոնց Եկեղեցի մը չի կրնար Քրիստոսի պատկանիլ: Որո՞նք են այն յատկանիշերը:
Այսօր աշխարհիս վրայ դժբախտաբար գոյութիւն ունին քրիստոնեայ բազմազան Եկեղեցիներ (օրթոտոքս,
կաթողիկէ, աւետարանական, են.): Նոյն Քրիստոսը դաւանող երեք այս Եկեղեցիները, դժբախտաբար
կարգ մը հարցերուն մէջ իրարմէ կը տարբերին: Արդ այս Եկեղեցիներուն իւրաքանչիւրը ինքզինք
հաւասարապէս Քրիստոսի հարազատ Եկեղեցի կը դաւանի: Ինչպէ՞ս գիտնալ թէ անոնցմէ ո՞ր մէկը
Քրիստոսի հարազա՛՛տ Եկեղեցին կը ներկայացնէ: Այս հարցումին պատասխանելու համար, հարկ
է նախ գիտնալ թէ որո՞նք են Քրիստոսի հիմնած իսկական Եկեղեցիին յատկանիշերը: Հայոց
Եկեղեցիին շուրջ` կը խորհինք թէ Հայ Եկեղեցին սոյն յատկանիշերը ամփոփած է իր «Հաւատամք»
ին մէջ, երբ պատարագի ընթացքին` օրուան աւետարանէն ետք կը հռչակէ. «Հաւատամք ի մի միայն,
ընդհանրական եւ առաքելական սուր Եկեղեցի»: Ուրեմն Հայերուս համար Եկեղեցիին յատկանիշերը
այս չորսերն են. Մկրտութիւնը, ընդհանրականութիւնը (կամ յունարէն բառով` կաթողիկէութիւնը),
ռաքելականութիւնն ու սրբութիւնը: Այս յատկանիշերուն չո՛րսն ալ էական են, չո՛րսն
ալ միատեղ գտնուելու են Քրիստոսի Եկեղեցիին մէջ:
Քրիստոսի Եկեղեցին Մէ՛կ է: Այս
է Քրիստոսի Եկեղեցիին առաջին յատկանիշը: Քրիստոս իր մահուան նախօրեակին` վերջին աղօթք
մը ուղղեց իր Հօր, Եկեղեցիին միութեան համար ըսելով. «Թող մէ՛կ ըլլան ինչպէս որ մենք
մէ՛կ ենք» (Յովհ. 17,22): Քրիստոս մէ՛կ Եկեղեցի հիմնեց, մէ՛կ կրօն քարոզեց, մէ՛կ հեղինակութիւնը
սահմանեց եւ մէ՛կ Եկեղեցիի համար ալ աղօթեց: -Այս մէկութիւնը` նախ Եկեղեցիին սերտ
միութիւնն է Քրիստոսի անձին ու հոգիին հետ, ինչպէս որ զաւակի մը իր մօր հետ միութիւնը`
նոյն արիւնն է: -Այս մէկութիւնը զօրելու է Եկեղեցիէն ներս նաեւ դաւանանքի մէկութեամբ:
Կարելի չէ Քրիստոսի նոյն Եկեղեցիին պատկանիլ, նոյն Քրիստոսը դաւանիլ եւ իրարմէ տարբեր
դաւաանքներ ունենալ, հաւատալով տարբեր ճշմարտութիւններու, զորս Քրիստոս չէ աւանդած կամ
չէ հաստատած: -Յիստուսի հետ այս մէկութենէն կը բխի նաեւ Եկեղեցիներուն միջեւ հրամանի
մէկութիւնը: Ինչպէս որ նոյն հաստատութեան մը զանազան մասնաճիւղերը իրենց հրահանգներն
ու ուղղութիւնները մէկ կեդրոնէն կ’առնեն, նոյնպէս ալ ազգերու Եկեղեցիները: Ազգի մը մշակոյթի
եւ աւանդութիւննե-րուն տարբերութենէն բխող զանազանութիւնները կամ յատկանիշերը չեն խախտեր
Քրիստոսի փափաքած եկեղեցական միութիւնը: 2. Քրիստոսի Եկեղեցին, իր մէկութեան
մէջ, ընդհանրական է եւ ասիկա անոր երկրորդ յատկանիշն է: Ազգերը իրարմէ տարբերած
են նաեւ իրենց կրօններով: Իսկ Քրիստոսի հիմնած Եկեղեցին բոլոր ժամանակներու եւ բոլոր
ազգերուն համար է եւ կ’ընդգրկէ բոլոր ժողովուրդները, յետամնաց, սեւամորթ, հնդիկ կամ ոչ: Քրիստոսի
Եկեղեցին ազգի մը վերապահուած չէ: Եկեղեցին միջազգային է: Բոլոր ազգերը հոն տեղ ունին,
իրենց ազգային դիմագիծով եւ ինքնութեամբ, աւանդոյթնե-րով, մշակոյթով, լեզուով, ծէսով
եւ ցեղով: (Քաղուած Անդրանիկ Վրդ. Կռանեանի գիրքէն)