Папа заклікаў супрацоўнікаў Рымскай курыі да супраціву сумлення адносна плётак
Святы Айцец сустрэўся
21 снежня 2013 г. з супрацоўнікамі Рымскай курыі. Такія спатканні – традыцыйныя, яны
ладзяцца на заканчэнне году і з’яўляюцца своеасаблівым падвядзеннем яго вынікаў. Пантыфік
выказаў падзяку “усім, як працоўнай супольнасці”, і кожнаму асабіста за штодзённае
служэнне: “за клопат, працавітасць, крэатыўнасць, за не заўсёды лёгкія намаганні супрацоўніцтва
ў выкананні абавязкаў”. Папа не забыўся пра тых, хто ў гэтым годзе заканчвае служэнне
і сыходзіць на пенсію. Ён нагадаў, што святары і біскупы ніколі не ідуць на пенсію,
яны проста пакідаюць сваю пасаду, каб “больш прысвяціць сябе малітве і клопату пра
душы, пачынаючы ад сваёй уласнай”. Пантыфік прызнаўся, што заўсёды захапляўся мансіньёрамі,
якія акуратна і старанна, да самаадрачэння няслі і нясуць сваё служэнне ў Рымскай
курыі. “Прафесіяналізм і служэнне” – гэта тыя рысы, якімі, на думку Папы, павінен
характарызавацца супрацоўнік, а сабліва кіраўнік, Рымскай курыі. Прафесіяналізм, нагадаў
ён, гэта “кампетэнтнасць, адукацыя, удасканаленне і абнаўленне навыкаў”. Хоць ён набываецца
з часам, для яго паўстання павінна быць добрая аснова, перакананы Святы Айцец. “Другой
асаблівасцю з’яўляецца служэнне, служэнне Папе і біскупам, для Паўсюднага Касцёла
і Касцёлаў мясцовых”, - нагадаў Францішак і дадаў, што у Рымскай курыі трэба вучыцца
“дыхаць” менавіта “гэтым двайным вымярэннем Касцёла”, “узаемапранікненнем універсальнага
і мясцовага”.
На думку Папы, калі адсутнічае прафесіяналізм, чалавек “павольна
саслізгвае ўніз да пасродкавасці”. “Папкі са справамі становяцца банальнай інфармацыяй
і паведамленнем, пазбаўленым зачыну жыцця”, лічыць ён. З іншага боку, звярнуў увагу
Пантыфік, “калі няма паставы служэння мясцовым Касцёлам і іх біскупам, разрастаецца
структура курыі як цяжкай бюракратычнай, кантрольнай і інквізіцыйнай структуры, якая
не дазваляе дзейнічаць Святому Духу і развівацца Божаму народу”.
Да прафесіяналізму
і служэння Святы Айцец дадаў трэцюю рысу – святасць жыцця. Яна ў іерархіі каштоўнасцяў
найбольш важная. Больш за тое, лічыць Папа, яна таксама “з’яўляецца асновай якасці
працы і служэння”. “Святасць азначае жыццё ў Духу Святым, адкрытасць сэрца на Бога,
няспынную малітву, глыбокую пакору, братэрскую любоў у адносінах з калегамі”, - нагадаў
ён. Святасць у Рымскай курыі, дадаў Пантыфік, “гэта таксама супраціў сумлення адносна
плётак”. Ён з жалем назваў плёткі “няпісаным законам нашых асяроддзяў”. “Плёткі шкодзяць
якасці людзей, працы і асяроддзя”, - падкрэсліў Святы Айцец.
Францішак заклікаў
супрацоўнікаў Рымскай курыі да адзінства, падзякаваў яшчэ раз за іх працу і папрасіў
аб малітве.