Патрыярх Кірыл у захапленні
ад пантыфікату папы Францішка. Ён прызнаўся ў гэтым кардыналу Курту Коху, які на гэтым
тыдні здзяйсняў візіт у Санкт-Пецярбург і Маскву. Ватыканскі іерарх сустрэўся з праваслаўным
лідэрам 18 снежня 2013 г. Ён паведаміў у інтэрв’ю Ватыканскаму радыё, што размова
ішла пра ўзаемасувязі паміж Рускай Праваслаўнай Царквой і Каталіцкім Касцёлам, тэалагічны
дыялог і выклікі сучаснага грамадства для хрысціян. Суразмоўцы не абмінулі і палітычную
сітуацыю ў свеце.
Кардынал прызнаўся, што закраналася і пытанне сустрэчы Папы
і Патрыярха. “Аб гэтым ідзе размова пастаянна. Адказны за экуменічныя адносіны Рускай
Праваслаўнай Царквы, Мітрапаліт Іларыён, неаднаразова падкрэсліваў, што больш важная
за дату сустрэчы, яе падрыхтоўка. І я падтрымліваю гэтую пазіцыю. Для гэтага патрэбны
час”, - сказаў ватыканскі іерарх.
Патрыярх Кірыл вельмі задаволены гэтым пантыфікатам,
адзначыў кардынал Кох, перш за ўсё, ён захапляецца тым, як папа Францішак кіруе Касцёлам
і адносіцца да людзей. Прадстаяцель станоўча падкрэсліў таксама спосаб падыходу Святога
Айца да бедных і сям’і.
Старшыня Папскай рады не хавае, што праблемным для
Рускай Праваслаўнай Царквы застаецца пытанне Украіны. “Перш за ўсё, гаворка ідзе пра
яе заклапочанасць адносна аб’яднанай з Рымам Украінскай Грэка-Каталіцкай Царквы. Да
гэтага пытання мы пастаянна вяртаемся”, - прызнаўся кардынал. Ён дадаў, што гаворка
з Патрыярхам ішла таксама пра палітычнае развіццё ва Украіне, паколькі краіна стаіць
перад небяспекай расколу. “Гэта вельмі неадкладны выклік”, - заявіў старшыня Папскай
рады спрыяння хрысціянскаму адзінству.