Дзяржсакратар Яго Святасці: карэйцы павінны быць братамі аднаго народа
Святы Пасад спадзяецца
на мір паміж Паўночнай і Паўднёвай Карэяй і на прызнанне правоў чалавека ва ўсім рэгіёне
паўвострава. Для гэтага патрэбна адкрыццё шляхоў дыялогу і пошук супольных пунктаў,
да якіх належыць дапамога ў выпадку стыхійных бедстваў, заявіў Дзяржаўны сакратар
Яго Святасці Папы арцыбіскуп Пьетра Паралін у карэйскім каледжы ў Рыме 19 снежня 2013
г. увечары. Нагодай для візіту стала 50-годдзе ўстанаўлення дыпламатычных адносін
паміж Карэяй і Святым Пасадам, паведаміла “L’Osservatore Romano” у сваім сённяшнім
выпуску. Карэйцы павінны мець магчымасць“адчуваць сябе братамі аднаго народа”, сказаў
ватыканскі іерарх.
Касцёл у Карэі з самых сваіх пачаткаў у XVIII ст. цярпеў
шматлікія ганенні, сказаў арцыбіскуп Паралін. Але “пасля пераследу і зімы мы прыйшлі
да вясны і ператварэння Карэі з місійнай краіны ў краіну місіянераў”, - дадаў ён.
З
49-мільённага насельніцтва Паўднёвай Карэі 5,1 млн., паводле інфармацыі Святога Пасаду,
з’яўляюцца католікамі. У Паўночнай Карэі любое публічнае вызнанне рэлігіі забаронена,
таму няма дакладнай інфармацыі пра колькасць вернікаў Каталіцкага Касцёла.