Papa Françesku: Italia duhet të luajë kartën e pasurisë kulturore
Të jeni gjithnjë në shërbim të “kulturës së takimit”. Kështu u tha Papa Françesku,
funksionarëve të Ceremonialit diplomatik të Republikës Italiane dhe punonjësve të
Ambasadës Italiane pranë Selisë së Shenjtë, të cilët i priti në Vatikan. Pasi falenderoi
të gjithë italianët, që punojnë në Sekretarinë e Shtetit e në Prefekturën e Shtëpisë
Papnore, Papa theksoi përmasën e takimit, në misionin e diplomacisë: “Për natyrën
e shërbimit tuaj, ju jeni në gjendje të favorizoni ‘kulturën e takimit’. Jeni funksionarë
të diplomacisë dhe gjithë puna juaj duhet t’u mundësojë përfaqësuesve të vendeve,
të organizatave ndërkombëtare, të institucioneve, të takohen sa më frytshëm. Sa i
rëndësishëm është ky shërbim!” Duke pasur parasysh pasurinë e pakrahasueshme
kulturore e artistike të Italisë, Ati i Shenjtë i nxiti diplomatët italianë të luajnë
me profesionalitet kartën e kësaj trashëgimie për të favorizuar takimin ndërmjet njerëzve
e kulturave. E së fundi, festa e Krishtlindjes e urimet e Papës: “Edhe ata,
që nuk janë të krishterë, preken nga mesazhi i lindjes së Jezusit. Uroj, që secili
prej jush, ta jetojë intensivisht këtë mister dashurie; uroj që ai të frymëzojë thellësisht
edhe shërbimin tuaj”.