Святы Пасад распрацаваў дакумент аб выхаванні да міжкультурнага дыялогу
Выхаванню да міжкультурнага
дыялогу прысвечаны новы дакумент Кангрэгацыі Каталіцкай Адукацыі, які быў прадстаўлены
19 снежня 2013 г. у Ватыкане. Поўная назва дакументу: “Выхоўваць да міжкультурнага
дыялогу ў каталіцкай школе. Жыць разам для цывілізацыі любові”. “Вельмі важнай і своечасовай”
назваў гэту тэму кардынал Зянон Грахалеўскі, прэфект ватыканскай дыкастэрыі, хоць
яна і не новая. Касцёл ужо на працягу многіх стагоддзяў ажыццяўляе сваё адукацыйнае
служэнне ў полікультурнай і шматканфесійнай рэальнасці. Сёння, аднак, дадалася іншая
з’ява – міграцыя глабалізавала рэальнасць мультыкультуралізму і мультырэлігійнасці,
у выніку чаго паўстала неабходнасць адпаведнай міжкультурнай адукацыі ў школе.
Адрасатамі
дакументу з’яўляюцца перш за ўсё бацькі, якія граюць галоўную ролю ў працэсе выхавання
дзяцей, таксама настаўнікі і супрацоўнікі каталіцкіх школ, нацыянальныя і дыяцэзіяльныя
біскупскія камісіі, манаскія супольнасці, біскупы, рухі, асацыяцыі і іншыя касцёльныя
органы, якія нясуць адукацыйнае служэнне. Кангрэгацыя прапануе яго “у якасці сродку
дыялогу і разважанняў для ўсіх тых, хто клапоціцца аб выхаванні чалавека для будаўніцтва
мірнага грамадства і салідарнасці”.
Тэма адукацыі да міжкультурнага дыялогу
прадстаўлена тут у больш шырокім кантэксце. Закранаюцца пытанні суадносін культуры
і рэлігіі, каталіцызму і іншых рэлігій, тэалагічных асноў тоеснасці каталіцкай школы,
што палягае на выкладанні каталіцкай рэлігіі, якая добра спалучаецца з павагай да
асабістай свабоды.
Ключавым словам, што звязвае разам усе аспекты, якія разглядаюцца
ў дакуменце, з’яўляецца “дыялог”. Дыялог – гэта стаўленне, з якім Касцёл адносіцца
да асобы ў любой сітуацыі, нагадаў кардынал Грахалеўскі меркаванне папы Францішка.
Канчатковая мэта адукацыі да міжкультурнага дыялогу, нагадаў ён, стварэнне
цывілізацыі любові. У рамках каталіцкай школы, гэта можа і павінна адбыцца, калі сумяшчаць
адукацыйную задачу з бачным абвяшчэннем Евангелля, лічыць прэфект Кангрэгацыі Каталіцкай
Адукацыі.