Патрыярх Кірыл звязвае вялікія чаканні з папам Францішкам
У развіцці Рускай
Праваслаўнай Царквы за апошнія гады ёсць нешта падобнае да таго, што адбываецца ў
Каталіцкім Касцёле, асабліва ў сувязі з абраннем папы Францішка, лічыць Патрыярх Маскоўскі
Кірыл. 18 снежня 2013 г. у Маскве ён сустрэўся са старшынёй Папскай рады спрыяння
хрысціянскаму адзінству, кардыналам Куртам Кохам, паведамляе сайт Аддзела знешніх
царкоўных сувязяў Маскоўскага Патрыярхата. Прадстаяцель згадаў, што за два гады, якія
прайшлі з моманту яго папярэдняй сустрэчы з ватыканскім іерархам, у жыцці Рускай Праваслаўнай
Царквы і Каталіцкага Касцёла адбылося шмат значных падзей, перш за ўсё, абранне новага
Пантыфіка. Ён не стаў хаваць, што звязвае з гэтым вялікія чаканні, бо многае з таго,
што заяўляе Папа, што ён прапануе свету і грамадству, супадае з бачаннем Рускай Праваслаўнай
Царквы. Патрыярх цэніць тое, што Францішак неаднаразова выказваў свае сімпатыі ў адрас
праваслаўных.
Іерарх назваў тыя тэмы, па якіх пазіцыі дзвюх Цэркваў супадаюць:
сітуацыя на Блізкім Усходзе, у прыватнасці, па сірыйскім канфлікце, захаванне ў сучасным
свеце традыцыйных сямейных каштоўнасцяў, скарачэнне колькасці разводаў, супрацьдзеянне
абортам і абарона самаго інстытута сям’і. Свет сёння таксама стаіць перад выклікам
ўсё большай сацыяльнай няроўнасці і беднасці, адзначыў Патрыярх. “У нас ёсць гісторыя
адносін, вопыт супрацоўніцтва, які дае магчымасць з аптымізмам глядзець у будучыню”,
- дадаў ён.
Кардынал Кох, цытуючы папу Францішка, адзначыў, што католікам
ёць чаму павучыцца ў праваслаўных, асабліва ў тым, што тычыцца біскупскай калегіяльнасці
і сінадальнасці. Ён назваў агульным для ўсіх хрысціян выклікам, непрыманне сучасным
светам хрысціянскіх каштоўнасцяў, адной з праяў чаго з’яўляецца крызіс інстытута сям’і.
На думку кардынала Коха, вялікае значэнне мае салідарная пазіцыя Цэркваў па сітуацыі
ў Сірыі і на Блізкім Усходзе.
У ходзе праведзенай гутаркі Патрыярх Кірыл і
Кардынал Кох абмеркавалі актуальны стан каталіцка-праваслаўнага тэалагічнага дыялогу
ў рамках Змешанай міжнароднай камісіі і тыя цяжкасці, з якімі ён сутыкаецца.
Ватыканскі
іерарх перадаў Патрыярху Маскоўскаму і ўсяе Русі прывітанне і добрыя пажаданні ад
папы Францішка.