Fillojmë sot leximin e përmbledhjes së thirrjes apostolike Evangelii Gaudium të
Papës Françesku, drejtuar mbarë Kishës më 24 nëntor 2013.Thirrja apostolike lindi
si përgjigje e Papës ndaj kërkesës së etërve të Sinodit për ungjillëzimin e ri, që
u mbajt vitin e kaluar në Vatikan, dhe paraqet porositë e Atit të Shenjtë për të gjithë
Kishën, në misionin e saj të shpalljes së Ungjillit në botën bashkëkohore. Thirrja
apostolike e Papës Françesku u drejtohet të gjithë të krishterëve, të cilët kanë misionin
t’i shpallin botës lajmin e gëzueshëm të shpëtimit. Ajo fillon me kumtimin e gëzimit,
që mbjell në zemrën e njeriut takimi me Krishtin. Njeriu, në botën aktuale, rrezikon
të pushtohet nga trishtimi individualist, që lind nga kërkimi i shfrenuar i të mirave
materiale dhe i kënaqësive të tjera, por edhe nga izolimi i ndërgjegjes. Ky rrezik
nuk kërcënon vetëm jobesimtarët: “Edhe besimtarët janë pranë këtij rreziku të sigurt
e të përhershëm. Shumë vetë bien pre e tij dhe shndërrohen në njerëz të mërzitur,
të pakënaqur, pa jetë” (n.2). Papa i fton të krishterët ta lejojnë Krishtin t’i
takojë përsëri. Kthimi tek Ai e ripërtërin gëzimin: “Sa mirë na bën të kthehemi tek
Ai, pasi kemi humbur!” (n.3). Ai na pret gjithmonë dhe “kthehet për të na ngarkuar
mbi shpatulla çdo herë” (n.3). Dashuria e tij e patrandshme na e bën të mundur ta
rifitojmë dinjitetin, sa herë që ta kemi humbur. Ajo është themeli i dinjitetit tonë.
Historia e shëlbimit është historia e kësaj dashurie, për këtë arsye tregimi i saj
në Bibël, qysh në Besëlidhjen e Vjetër, është plot me kumtime të gëzueshme. Një përmbledhje
dhe shprehje e fuqishme e gëzimit, që ngjall pritja e Mesisë, gjendet në librin e
Isaisë: “Profeti Isaia i drejtohet Mesisë, duke e përshëndetur me galdim” (n. 4. Is
9,2; 12,6; 40,9; 49,13). Ky gëzim gjendet kudo në faqet e Ungjillit, që nga lajmërimi
i ngjizjes së Jezusit deri tek lajmërimi i ringjalljes së tij, prandaj, “Pse të mos
hyjmë edhe ne në këtë lumë gëzimi?” (n.5). Papa Françesku e qorton stilin vetëm kreshmor
të jetës së krishterë, a thua se nuk kemi edhe pashkët e ringjalljes, por është i
vetëdijshëm edhe për rrethanat e jetës, shpesh herë shumë të vështira, në të cilat
errësohet gëzimi: “I kuptoj njerëzit, që priren kah trishtimi, për shkak të vështirësive
të rënda që duhet të durojnë, por pak nga pak duhet të lejojmë që të fillojë të zgjohet
gëzimi i fesë, si një besim i fshehtë, por i qëndrueshëm, edhe në mes të ngushticave
më të këqija” (n.6). Por nganjëherë gjejmë arsye të pamjaftueshme për t’u trishtuar,
ndërkohë që mund të gëzohemi edhe me pak, siç kujton Papa nga përvoja e tij e gjatë
mes njerëzve: “Mund të them se gëzimet më të bukura e të vetvetishme, që kam parë
gjatë jetës sime, janë gëzimet e njerëzve shumë të varfër, që kanë pak gjëra ku të
kapen. Kujtoj edhe gëzimin e pastër të atyre që, edhe në kulmin e angazhimeve të mëdha
profesionale, kanë ditur të ruajnë në zemër besimin, bujarinë dhe thjeshtësinë” (n.7). Ky
gëzim buron, pra, në takimin me Krishtin. Ai na çliron nga vetvetja dhe na lejon të
jemi jo vetëm njerëzorë, por edhe më shumë, sepse në miqësinë me Të “e lejojmë Hyjin
të na çojë përtej vetvetes, për të mbërritur qenien tonë më të vërtetë” (n.8). Gëzimi
është një e mirë dhe e mira përhapet për vetë natyrën e saj, prandaj gëzimi i krishterë
është ajo forcë, brenda nesh, që na shtyn drejt të tjerëve, për t’u përçuar atyre
lajmin e hareshëm, me hare. “Ungjillëzuesi – thotë Papa – nuk duhet të ketë vazhdimisht
një pamje prej funerali” (n.10). Përmbajtja e lajmit të gëzueshëm është gjithmonë
e njëjtë e gjithmonë e re: Krishti – Ungjilli i amshuar (Vep 14,6): “Ai mundet gjithmonë,
me risinë e tij, ta ripërtërijë jetën tonë dhe bashkësinë tonë, edhe pse kjo po përjeton
kohë të errëta dhe dobësimin kishtar. Parashtrimi i krishterë nuk vjetrohet kurrë”
(n.11). Krishti mund të thyejë edhe skemat e mërzitshme, brenda të cilave nganjëherë
e mbyllim, dhe kjo ndodh sa herë kthehemi tek freskia e Ungjillit. Kthimi tek
burimi i lajmit të mirë na bën të gjejmë rrugët e reja të ungjillëzimit, por duhet
të kujtojmë se “e reja e vërtetë është ajo që vetë Hyji, në mënyrë të mistershme,
dëshiron të prodhojë, ajo që Ai frymëzon, ajo që Ai ngacmon, ajo që Ai drejton dhe
shoqëron në njëmijë mënyra” (n.12). Kërkimi dhe gjetja e rrugëve të reja nuk nënkupton
shkëputjen nga tradita e Kishës, prandaj në rrahjen e këtyre rrugëve duhet të mbartim
kujtesën e trashëguar, sikurse apostujt mbartën kujtesën e Krishtit. Papa Kujton
Sinodin e Ipeshkvijve, që u mbajt më 7-28 tetor 2012 me temë Ungjillëzimi i ri
për përçimin e fesë së krishterë dhe thotë se i përgjigjet me kënaqësi kërkesës
së etërve sinodalë për të shkruar këtë thirrje apostolike. Për realizimin e ungjillëzimit
të ri, sipas përfundimeve të sinodit, duhen mbajtur parasysh tre rrafshe: ai i baritores
së zakonshme brenda bashkësisë së gjallë kishtare; ai i baritores me të pagëzuarit,
që nuk marrin më pjesë në jetën e Kishës dhe ai i shpalljes së Ungjillit për të gjithë.
Ati i Shenjtë thotë se këto tema, që kanë të bëjnë me Kishën dhe botën, nuk synon
t’i trajtojë në mënyrë përfundimtare dhe të plotë, duke u mbështetur në magjisterin
(mësuesinë zyrtare) e tij papnor, sepse “nuk është e përshtatshme që Papa të zëvëndësojë
episkopatet vendore në shqyrtimin e të gjitha problematikave që dalin në trojet e
tyre” (n.16).