Папа: калі Бог дазволіў нам пісаць сваю гісторыю, давайце дазволім Яму пісаць нашу
17 снежня 2013 г.
раніцай, у дзень свайго нараджэння, Святы Айцец запрасіў на ранішнюю Эўхарыстыю персанал
Дома св. Марты. Сённяшнее Евангелле, якое ўзгадвае поўную генеалогію Езуса, нагадвае
аб тым, што Бог цалкам увайшоў у гісторыю чалавека, звярнуў увагу Папа. Некаторым
можа здацца, што пералік імёнаў продкаў Хрыста, гэта нейкі “тэлефонны даведнік”, але
гэта не так, дадаў ён. “Бог пажадаў здзяйсняць гісторыю. З намі. Ён здзейсніў падарожжа
з намі”, - падкрэсліў Святы Айцец, “Бог не хацеў прыйсці, каб збавіць нас, без гісторыі.
Ён пажадаў рабіць гісторыю разам з намі”, гісторыю, “якая ідзе ад святасці да граху”.
У гэтым спісе ёсць святыя, “але ў ім таксама і мы, грэшнікі”, сказаў Папа і ўзгадаў
постаць біблійнага Саламона. “Мы пішам гэту гісторыю ласкі і граху, і Бог сярод нас”,
што з’яўляецца пацвярджэннем Яго пакоры, цярпення і любові, адзначыў Францішак і дадаў,
што Бог рады “дзяліць сваё жыццё з намі”. “У абліччы Божага Нараджэння, варта падумаць,
што калі Ён ажыццяўляў сваю гісторыю з намі, калі Ён узяў наша прозвішча, калі Ён
дазволіў нам пісаць сваю гісторыю, па меншай меры, давайце дазволім Яму пісаць нашу
гісторыю”, - заклікаў Святы Айцец і адзначыў, што гэта яго святочнае пажаданне для
ўсіх.