Իտալիոյ վարչապետը Լիբանանին կը տրամադրէ մարդասիրական եւ զինուորական զօրակցութիւն
Իտալիոյ վարչապետ Էնրիքօ Լեթա շաբաթավերջին պաշտօնական այցելութեամբ մը ժամանեց Լիբանան,
ուր յայտնեց, թէ Իտալիա սուրիացի գաղթականներուն օժանդակութեան համար 50 միլիոն տոլար
պիտի տրամադրէ` աւելցնելով, որ Իտալիա պիտի հիւրընկալէ լիբանանեան բանակին զօրակցութեան
խորհրդաժողով մը:Լեթա այցելեց Պըրժ Պարաժնէի մէջ գտնուող սուրիացի գաղթականներու յատուկ գաղթակայան մը, ուր յայտարարեց, թէ Իտալիա պիտի զօրակցի Լիբանան հասած սուրիացի գաղթականներուն:
«Իտալիա նեցուկ կը կանգնի Լիբանանին եւ կը փափաքի անոր օժանդակելու ընդմէջէն` օժանդակել նաեւ ձեզի», ըսաւ Լեթա:
Հանրապետութեան նախագահ զօր. Միշել Սլէյման Պաապտայի մէջ ընդունեց Իտալիոյ վարչապետը, որուն հետ քննարկեց լիբանանեան եւ շրջանային իրադարձութիւնները, ինչպէս նաեւ սուրիացի գաղթականներուն վերաբերող հարցեր:
Հանդիպումին ընթացքին Լեթա քննարկեց նաեւ Իտալիոյ կողմէ լիբանանեան բանակին տրամադրուած օժանդակութիւնները, եւ այս շրջագիծին մէջ ան հաստատեց, որ Իտալիա պիտի աւելցնէ բանակին տրամադրուած օժանդակութիւնները, յատկապէս` ռազմափորձերու եւ զինուորական մարտավարութիւններու առումով:
Լեթա հաստատեց, որ Հռոմ պատրաստ է լիբանանեան բանակին զօրակցութեան խորհրդաժողով մը հիւրընկալելու` գործակցութեամբ ՄԱԿ-ին:
Լիբանան հասած սուրիացի գաղթականներուն մասին նախագահ Սլէյման եւ Լեթա շեշտեցին անոնց օժանդակութեան առնչութեամբ միջազգային ընտանիքին կողմէ բեռը բաժնեկցելու յանձնառութեան պահպանումը:
| All the contents on this site are copyrighted ©. |